Shillong, Iaiong 22: U wei u briew u ba la shah kynnoh ba u la don kti ha kaba leh beijot ia ka khynnah 14 snem, la kem da ki pulit jong ka nongbah Shillong ha ka sngi thohdieng kaba hap hapoh jong ka Madanryting Police station, une u ba la kem da ki pulit la tip kyrteng kum u Bhaskar Rasaily.
U SP Shillong City u Bah Vivek Syiem u la ong ba ka dei ka jingshisha, ba ki pulit kila kem ia u Bhaskar, la iathuh ba ha dien ba ki pulit kila ioh ia ka jingtip kaba biang la lap ba une u briew u dei u ba trei kam shipai hapoh jong ka 58 GTC ha happy valley.
Na ka liang jong ki pulit kila thoh sha ki bor ba dei peit ia kane ka kynhun shipai bad na ka liang jong ki nongpyniaid jong ka 58 GTC ruh kila wan ialam ia u sha Madanryting Police station ha kaba ki pulit kila kem ia u.
Ha ka jingkynnoh jong ka khynnah kaba la shah leh beijot ka la ong ba u dei u Sagar ha kane ka jingtohkit jong ki pulit kila lap ia ka jingshisha bad ka kyrteng jong u ka dei Bhaskar Rasaily.
Na ka liang jong ki pulit kila kem ia une u shipai jong ka 58 GTC bad la pyngat ia u hapoh ka kyndon ain 3(a)/4/17 jong ka POCSO Act la ong u SP City. Ka jingthohkit ia une u nongleh kam sniew kala iaid sha khmat.
