Ha dien ka jingiakren bad ka HYC, mynjur ka skul bah USTM ban pynrung ia ka sobjek khasi

Shillong, Naiwieng 20: Mynta ka sngi kala don ka jingiakynduh hapdeng ki bor ba deipeit ia ka skul bah University of Science and Technology Meghalaya (USTM) bad ki nongialam jong ka seng HYC ban ia kren halor ka jingpynrung ban hikai ia ka ktien Khasi hapoh jong katei ka skul bah.

Ha kane ka jingiakren na ka liang jong ka USTM la lam khmat da u Chancellor u Mahbubul Hogue, Director Student Affairs Dr.Alpana Choudhury u bah  Fidel War Hony Director USTM Shillong office. U  Shamim Geony Dy. Registrar Admin Dr. Tiewri Lyngdoh Nonglait  Asst Professor Earth Science ki Nonghikai bad nongtrei ka USTM bad na ka liang jong ka HYC la lam khmat da u president u bah  Robert Kharjahrin, la don lang u Wellessly Lyngkhoi Education Secretary, Pynskhem Nongshlong bad kiwei ki dkhot ka Seng.

Kane ka jingiakren ha pdeng ki bor jong ka USTM bad ka HYC ka long halor ka jingthoh kaba kala buh sha katei ka skul bah ha u Nailar mynta u snem ba dei ban pynrung ia ka sobjek khasi hapoh kane ka skul bah kaba don 900 ngut ki samla pule khasi ha kane ka skul bah.

Ha dien ka jingia kren kaba sani bha mynta ka sngi na ka liang jong u Chancellor ka USTM u la ai ka mynjur ban sdang noh ia ka sobjek Khasi  khasi ha ka diploma course, Master degree bad Ph D. naduh u snem thymmai.

Kawei naka jingthmu jong ka Seng halor kane kalong ba bun kiba pule honours khasi ha kylleng kylleng ki kolej hapoh jylla ki duh noh ban bteng iaka master degree bad Ph.D namar kadon tang ha NEHU haka ba tang 60 ngut ki ioh ban pule haka shisnem, hynrei ki ba apply ki don da ki spah ngut, te kane Kan iarap iaki khynnah khasi ba kin nang lah ban bteng iaka jingpule ka sobjek khasi.

Kumjuh ruh da ka jingdon bun ki University ban ailad ban pule iaka subject khasi ha ki Ph.D kan nang wanrah ia shibun ki jingiohnong haka ban wadbniah bad pynriewspah iaka culture bad ka ktien khasi haka ba bun ngi dang hap ban tip shuh shuh.

Ka jinglah ban nang pynriewspah ban pule iaka subject khasi kan nang lah ban tei ruh iaka jaitbynriew kaba dang ialeh ban ioh jingithuh ban pynrung iaka ktien khasi haka khyrnit baphra ka riti synshar.

Kumta ka Seng ka sngew donbok bad ai jingiaroh iaka university kabala pdiang sngewbha bad pynurlong iaka jingkyrpad ka seng naka bynta ka jingmyntoi jong ka jaitbynriew hi baroh kawei la ong u Bah Wellessly Lyngkhoi Education secretary  HYC CEC ha ka kyrwoh kaba la phah mynta ka sngi.

What Next?

Recent Articles

Leave a Reply

Submit Comment

*