Shillong, Naitung 19: Ha dien ka jingialang kaba la neh kumba ar kynta hapdeng ki seng bhalang bad u myntri rangbah ka jylla u Dr Mukul Sangma, na ka liang jong ka sorkar kala shim ia ka rai ba ia ka jingshna ia ka lynti rely n buh teng shuwa katba ym pat lah ban pyntrei kam ia ki jaka rung jaka mih ban peitngor ia ki briew ba wan na sha bar sha kane ka jylla.
Haba kren ha ki nongthoh khubor ha dien ba la wai ka jingialang na ka liang jong u myntri rangbah ula ong ba ha kane ka jingiakren na ka liang jong ka sorkar kala pynsngewthuh ia ki seng bhalang ba ka jingslem ban shna ia ki jaka rung jaka mih jong ki briew ka dei na ka jingeh ha kaba ia dei bad ka jingshim jaka, hynrei ia ka bynta kaba nyngkong ka sorkar kan pyndep noh kloi lan katba lah.
Ban khang lad ia ki jingsah jong ki briew ha kane ka jylla, haba ia dei bad ki rule jong ka Meghalaya Safty bad Security Act, ka sorkar kan sa pynmih ia ka jingpynbna sorkar ha shuwa ka 15 tarik jong u bnai Nailur bad ha ka sngi rakhe ia ka sngi laitluid jong ka Ri India yn sa pynbna paidbah ia ki rule.
Ia ka ain Prohibition Benami Transaction Act, haba ia dei bad kane ka sorkar ka dang hap ban ia kren bad bun ki tnad sorkar, hynrei ia ki rule jong kane ruh ka sorkar kan sa leh noh shen katba lah ban ha dien jong u Nailur ka sorkar kan sa lah ban pyntrei kam.
Ha dien ba la sdang katto katne tylli ki jaka rung jaka mih ban pyntrei kam dei ban shim ba ka sorkar kala lah ban pyntrei kam ia ki ain ban khanglad ia ka jingwan rung ki briew bana bar sha kane ka jylla bad ha dien kata yn sa beteng biang ka jingshna ia ka lynti rel ha kine ki bynta jong ki lum khasi.
