Shillong, Risaw 23: Mynta ka sngi ka “Congress Legislature Party” kala pynlong ia ka jingialang hapoh MLA Hostel ban ia kren ia ki phang ba kin sa rah hapoh ka iing dorbar thawain ka jylla ha kane ka sien shong dorbar kaban sdang ha u 5th Naiweing 2020.
Haba kren ha ki lat pathai khubor ha dien ka jingialang u nongialam ka liang pyrshah u Dr Mukul Sangma u la ong ba ha kane ka jingialang jong ka CLP kaba la long mynta ka sngi kila ia kren ia kaei kaba kin rah hapoh ka iing dorbar ha kane ka dorbar ban sa wan.
Ki phang ba kongsan ba kin sa ia kren ki long, halor ka jingiapynbeit pud pynbeit sam ba ka jylla Assam, ka jingslem ban shna ia ki jaka rung jaka mih, ka jingbym lah trei kam kane ka sorkar kaba mynta.
Ha kane ka jingialang kila don ruh ki jingai jingmut na ki MLA ha kiba bun ki bynta ha kaba ia dei bad ki phang kaba kin sa rah hapoh ka iing dorbar ha kane ka kynti kaba mynta ban ia kren hapoh ka iing dorbar.
Kumba ka long mynta kane ka sorkar kala bakla ha baroh ki liang, la ong ba shuwa ka snem 2018 ka jylla kala paw ha ki liang baroh hynrei mynta kane ka sorkar kala khyngiat ia ka jylla sha trai bad kala pynbud niam ia ka jylla ha kiba bun ki liang. Kine baroh ki paw shai ba kane ka sorkar kam lah ban synshar.
