Shillong, Naiwieng
11: Ka Dorbar Kur Warjri ka ba Arphaew-ar ka la long ha Mawkneng ha ka ba da ki hajar ngut ki parakur parajait ki la poi sha kata ka dorbar bah. Ha ka jingkren maitphang jong u khliehduh ka Sengkur Warjri, Bah D L Warjri u la kyntu ïa la ki parakur ba kum ka jaitbynriew, dei ban pynkhlaiñ ïa ki seng Kur da ka ba kyrshan shitrhem lang ïa kiwei kiwei ki kur ha la Ri Khasi khnang ban kiew rasong shityllup ka jaitbynriew.
Kum uwei u riew rangbah u la pynkynmaw ïa ka ba la tyngkhuh ha ki snem shwa ban ïoh la ka jylla, u la kren mardor “Ha ka por jong ka sorkar Assam, u myntri rangbah Bishnu Ram Medhi u la ju pynshlur ïa ki samla shynrang Assamese ban shongkha bad ki kynthei Khasi bad u da kular ban ai khusnam na ka bynta kata, namar ka jingthmu ka long ban tyllep noh ha baroh kawei ka thaiñ ban long tang kawei ka jaitbynriew ha jylla”.
Kumta la ai ka jingïaroh ïa ki nongïalam Khasi ha kata ka por ki ba la iohi jngai ban ïakhun na ka bynta ban ïoh noh la ka jylla haduh ban da jop. Ha kawei pat ka liang u Bah D L Warjri u la kdew ba ka long ka ba donkam ruh ban im adkar bad tei la ka jingim ban kyntiew ïa ka burom jong lajong bad jong ka kur ka jait khnang ban rasong ka nam ka burom jong ka jaitbynriew.
Ha kane ka dorbar bah jong ka kur Warjri la pynkup burom ruh ïa ki parakur ki ba la tyngshaiñ bad kiew irat ha la ki kam pule bad kam ba ki trei da u Bah Riewad V Warjri, rangbah Kur ba la shongthait na ka kam kittiensyiem (envoy, ambassador) jong ka Ri India ha kylleng ka pyrthei. Ki ba la ïoh takma donburom ha kata ka sngi ki long u samla Dakynmawlang Warjri u ba la jop ban long nyngkong (1st Class) bad ka kydan ba ha khlieh tam eh (Distinction) ha ka pule B. E. Electrical & Electronics Engineering na Sathyabana Institute of Science and Technology University, Chennai.
U samla Phyrnailang Warjri u ba la jop ba nyngkong ryngkat ka takma ksiar (1st Class Gold Medallist) ha ka M. Sc. Mathematics na salonsari NEHU, Shillong; ka samla Sally Gracia Warjri ka ba la jop ba nyngkong la shiphew ha khlieh (1st Class- 10th position) ha ka B. Sc. Physics na salonsari NEHU, Shillong; bad u rangbah pulit Bumper Warjri, Sub Inspector u ba la jop Khusnam (Excellence Award 2018) ha la ka kam ban pynïaid ryntih ïa ki kali (Traffic) na ka shlemtrei u Deputy Commissioner, East Khasi Hills District, Shillong.
Ha kane ka sngi la don ruh ki kam lehkai byrngia na ki khynnah bad samla ki ba tbit ha ka rwai ka shad tynrai bad ha ka rukom mynta bad la ai jingkheiñ jingdiah da u Bah Sunshine Warjri, Saiñpynïar ka Seng Kur halor ki kam bhalang jong ki parakur parajait kylleng ka Ri Khasi.
