Shillong, Jylliew 21: U Chief Executive Member jong ka Khasi Hills Autonomous District Council (KHADC) u bah Titosstarwell Chyne la iathuh ba ka Executive Committee kaba la ia shong mynta ka sngi kala shim ia ka rai ban wanrah biang ia ka “KHADC, Khasi Social Custom of Clan”, Bill 2020 ha kane ka dorbar lyiur ban sdang ha ka 6th Naitung 2022.
Haba kren ha ki lat pathai khubor la ong ba ia kane ka Bill la pdiang da ka iing dorbar ha ka por jong long CEM jong u bah HS Shylla ha u snem 2018 bam kwai ha dwar u blei, la phah sha u Lat ka jylla hynrei la pynphai biang sha KHADC ryngkat ka shithi.
Kane ka EC kaba mynta kala thung ia ka Kommittee kaba kyrpang ia kaba la khlieh da u bah Bindo M Lanong ban peit bniah ia ka bad ha dien ba kila ia jingmut ban ia bishar bniah kila ai ia ka kaiphot sha ka EC.
Ha dien bala ioh ia ka kaiphot la phah sha baroh ki MDC ba kin ai jingmut hynrei ym shum don ba ai jingthoh ei ei kane ka pyni ba kila pdiang ia ka kaiphot na ka Kommittee, kumta kane ka EC kala shim ia ka rai ban wanrah biang ia kane ka Bill ha kane ka sien shong dorbar lyiur.
U CEM u la ong ba kane ka Bill ka long kaba don kam haduh katta katta bad kymren ba ka iing dorbar kan pdiang ia kane ka bill, ha dien ba la pdiang da ka iing dorbar kin sa phah biang ia ka sha u Lat ka jylla ban ioh ia ka jingmynjur, kane ka bill ka long ban buh ryntih ia ki kur ki jaid khasi.
Ha kane ka dorbar yn wan rah ruh ia ka Bill na ka bynta ki hima, ka Hima Mawiang Syiemship, Hima Nongstoin Syiemship Act ka don ka jingpynykla, Hima Nongkhlaw bad ka Nongsohpoh Syiemship.
Ka EC kala rai ban wanrah ruh ia ka United Khasi Hills Jaintia Hills Autonomous District (Appointment and Succession of Chief and Headman) Bill 2022, haba ia dei bad ka Hima Mylliem ka dei ka jingpynkylla ia ka rule, kata ka long ban shah ia ka Hima Mylliem Rule 2022, kata ka long ban ai jingbit ban thung rangbah shnong, shipor.
Katkum ka ain, ka Hima kam lah ban thung rangbah shnong shipor, hynrei na ka daw jong kane ka khlam COVID-19 u syiem Mylliem u la shu thung ia ki rangbah shnong ba shipor kaba l ong beain, kane ka Bill ka long ban shah ia ka Hima ban thung Acting.
