Shillong, Nohprah 13: Mynta ka sngi ka seng HITO kala leit ban ia kynduh ia u Director ka tnad ka koit ka khiah ban ia kren halor ka jingeh kaba ki paidbah ki ia kynduh kiba hap hapoh jong ka Saphai PHC bad ia ki jingeh ki jaka ai jingsumar ka sorkar ha Jaintia Hills baroh kawei.
Ha dien ka jingiakynduh bad u DHS u Dr. A War, u bah A Dkhar u la iathuh ba ha kane ka jingiakynduh la ia kren halor ki jingeh kiba ka Saphai PHC ka ia kynduh bad kum juh ia ki jingduna ki jaka sumar ka sorkar ha Jaintia Hills baroh kawei, kumba ka long ia kane ka PHC pat plie haduh mynta la kyntu ban plie noh.
U President rangbah ka Hito u bah Donbok Dkhar la kyntu ia ki paidbah ban ia treilang bad ka tnad ka koit ka khiah jong ka sorkar bad kata ka jingiatreilang lada shem ba don doctor tang wei lane ar ki paidbah kin wan sha khmat ban batia ia ki jingeh ym ban shu ia kren na dien khnang ba ka sorkar ruh kim don ka jingiatreilang.
U bah W Dkhar General Secretary la ong ba bun ki jingduna ha ki jaka ai jingsumar bad bun sien don tang ki nurse, hynrei kaba kongsan dei ban don ki dawai, ki dawai kiba don dei tang dawai baiong khlieh bad jyrhoh na ka liang ka seng ka kyntu ia ka sorkar ba ka lah ban pynbiang ia ki dawai kiba juh ktah ia ki paidbah.
La kdew ruh kum ka Namdong PHC, ka Yokisi ruh kum juh bad ki jingduna kiba long kyllum ka long kum ka Um, ka Light, la ong ba kane ka jingiakynduh bad u DHS ka long ba ki ioh ban ia mir jingmut ha kaba u la btai ia ki jingeh baroh.
Ha kane ka jingia kynduh na ka liang jong u DHS u la ai ka jingkular ba un sa bud dien ia kine ki jingdawa ka seng ban peit ba ki jaka ai jingsumar ha Jaintia Hills kin ioh ia ki jingdon kam kumba ka seng ka pynpaw.
Ka jingduna ka long ba kam don kata ka Ambulance, kaba don mynta ka don jong kiwei ki riew shimet, lada ka sorkar kam lah ban ai ia ka Ambulance ka seng HITO kan ai Ambulance noh ia ka sorkar kawei. Ha kane ka jingleit ia kynduh la don lang u President ka Sahsniang u samla Pynhun Chulet.
