Shillong, Kyllalyngkot 8: Mynta ka sngi ha Hynniewtrep Youth Council (HYC) hapoh ka jingialang jong u president u bah Robertjune Kharjahrin kila leit ban ia kynduh ia u Director jong ka tnad Infiltration u bah O Pasi ban sngewthuh ia ka jingtrei kam jong kane ka tnad sorkar ba dei peit ban khanglad ia ka jingwan rung ki briew kiba na bar sha ka jylla.
U President ka HYC u bah Robertjune haba kren ha ki lad pathai khubor ha die ka jingiakynduh bad u Director u la iathuh ha kane ka jingiakynduh mynta ka sngi u bah Pasi u la kubur ba ka tnad Infiltration ka dang don shibun ki jingduna, khamtam ki briew namar ba la pyndon kam da ki juh ki pulit jong ka District.
Ka jingduna ka long ruh ha ka jingdon ia ki jaka trei kam jong ki pulit, kum ki khyrdop, ki kali. Kumba kala paw na ka jingioh kem ia ki briew tang na Byrnihat bad Ratacehrra ka long palat ia ka lai hajar ngut ki briew ha dien ka jylla Assam kala pyntrei kam ia ka NRC.
Na ka jingiakren bad u Director ka tnad Infiltration la sngewthuh ba ki pulit ki don ha ka jingeh ban leh ia kane ka kam nalor ba kila duna briew ha ki District kin leh ia kane ka kam ban peit ia ka jingwan rung ki briew ba nabar ka la khia palat ka kam na ka bynta jong ki.
U bah Robert u la ong ba kum ka seng ha kine ki sngi kan sa leit ban ia kynduh ia u myntri kam poh iing jong ka jylla u James K Sangma ban dawa na ka sorkar ba ka dei ban don noh la ka jong ka kynhun pulit ba dei jong ka tnad Infiltration bad ba ka sorkar kan pynbiang ia ki jingdon kam jong kane ka tnad sorkar kaba don kam.
U Bah Robert u la ong ruh ba lada ka jylla kan ioh ia ka Inner Line Permit dei kane ka tnad Infiltration ka ban peit ia ka jingwan rung jong ki briew na sha bar bad ka jingpynkhlian ia ka jingtrei kam jong ka long kum ka jingpynkhreh lypa na ka bynta ka jingpyntrei kam ia ka ILP.
