Shillong, Nailar 21: U Myntri Rangbah ka jylla u Conrad K Sangma mynta ka sngi u la sdang ia ka jingialang bad ki MLA na East Khasi Hills District ban ia kren halor kane ka jingiakhun pyrshah ia ka jingsaphriang kane ka khlam COVID-19 ha ka jylla baroh kawei.
Haba kren ha ki lat pathai khubor ha dien ka jingialang na ka liang jongu myntri rangbah u la pynpaw ba ha kane ka jingiakren ka rai kaba kham ha khmat eh ka long ban thaw ia ki COVID-19 Kommittee ha ki Konstitwensi ha kaba yn khlieh da u MLA jong ka Konstitwensi.
Da ka jingdon ia kane ka kommittee ban pynsuk ban ia ka jingiadei bad ki COVID-19 Committee ha ki shnong ki thaw, kan don ka jingiadei bad biang bad ki bor jong ki District Administration, ha ki Block bad ki tnad sorkar kiba ia dei bad kane ka kam.
La iathuh ba ia kane ka juh ka jingialang yn sa pynlong ha kiwei ki District ha ka jylla ruh kum juh ha kaba yn sap hah ia ki myntri Kabinet ba kin khot ia ka jingialang bad ki MLA jong ki District ban ia kren bad ban shim ia kane ka juh ka rai ha kiwei ki District ruh.
Ha ka juh ka por u myntri rangbah u la kyrpad ruh ia kiwei MLA ban peit ruh ia kaei ka ban long ha ki por ki ban dang wan kaei kan jia na kane ka khlam COVID-19 ba kumno ki kommittee ha ki shnong bapher bapher ban peit lada long kaba lah ban pynshong ha iing wat ia kiba la test Positive la da don ka lat.
Ha kane ka jingialang la ia kren ruh lada long kaba lah ban don ia ki “Corona Care Centre” ha ki shnong bad la ia kren ruh kumno ban dang pynkhlain shuh shuh ia ki Corona Centre kiba don mynta ha ki District bapher bapher ha ki District hapoh ka jylla.
U Myntri Rangbah ka jylla u la iathuh ba baroh ki MLA kiba la wan ban ia shim bynta ha kane ka jingialang kila pynsngew ia ka jingeh kaba ki don bad ha ka juh ka por kila ai jingmut ruh sha ka sorkar bad ka sorkar kala shim ia ka jingai jingmut ka jong ki kumno ban iada na kane ka khlam COVID-19.
