Shillong Nailar 04: Ka Khasi Jaintia Deficit School Teachers Association (KJDSTA) ka la pynpaw ia ka jingsngew kmen ban kin sa ioh noh shen ia ka Education Policy bad ka Service Rules hadien 45 snem ba ka jylla ka la ioh ia ka jylla.
Haba kren sha ki nongthoh khubor mynta ka sngi hadien ba la wai ka jingialang kut snem kaba 36 jong ka KJDSTA u President u Bah ED Nongsiang u la ong ba katkum ka jingiathuh u Commissioner-Secretary ka tnad pule puthi, ka sorkar ka la pynkhreh shaid shaid ban pyntreikam ia ka Education Policy bad kumjuh ia ka Service Rules ia ki nonghikai deficit ha ka jylla.
Ki nonghikai deficit ki don kumba 3200 ngut eiei ha ka jylla baroh kawei ki la dawa na ka sorkar ba ka dei ban shimti noh ia ka kam nonghikai (provincialisation) hynrei ym shym la pdiang da ka sorkar. Hynrei na ka liang u Bah Nongsiang u la ong ba ka jingthaw ka sorkar ia ka Service Rule, National pension scheme ki dei shi bynta kum ka jingpdiang ia ka Provincialisation.
Watla ym pat tip lano kan sa urlong kane, hynrei na ka liang u Bah Nongsiang u la ong ba ka seng ka la pynpaw ia ka jingsngew kmen ba ki kam ki la paw hadien ba ka seng ka la iakhih bad iai dawa na ka por sha ka por haduh mynta.
Ha kajuh ka por, u Bah Nongsiang u la iathuh ba ka seng ka la buh ia ka jingtyrwa ha ka 5th Pay Commission ba ka dei ban pyntreikam ia ka Assured Career Progressive Scheme na ka bynta ki nonghikai deficit khnang ba kin ioh ia ka jingmyntoi ban kiew kyrdan lem namar ba kumba ka long mynta ki nonghikai ki sahkut sah ha ka kam haduh ba kin shongthait kumjuh.
Kawei pat kaba ki nonghikai ki la buh ia ka jingtyrwa ha ka Commission ka long ban pyntreikam ia ka National Pension Scheme ia ki nonghikai ba la shong thait, ban ai bai shah sumar bad ruh ban pynjlan ia ka por shongthait na ka 60 sha ka 62 snem.
Ka KJDSTA ka la dawa ruh ba na ka sorkar ba haba ka pynrung ia kano kano ka sobjek thymmai ka dei ban long kiba la mang bad siew tulop da ka sorkar ym ban shu pynrung khnang ban lait ka jingban khia ia ki kmie ki kpa.
U Bah Nongsiang u la iathuh ruh ba ka seng kan sa pynlong ia ka jingpynkup ia ki nonghikai kiba la shah pyntbit ha ka Global School Room, na ka Dublin University ha ka diploma ha u bnai Risaw ban wan. Ka la kyntu ruh ia ki nonghikai ba kin peit ia ka facebook ka account ka seng man ka por khnang ba kin lah ban ioh ia ki jingtip.
Ha kane ka sngi, ka KJDSTA ka la bynshet biang ia ka kam president ha u Bah ED Nongsiang katba ia ka kam General Secretary la pynkhamti ha u Bah SL Rapthap ba kin bteng ia ka kam haduh ban urlong ka 5th Pay Commission ka sorkar jylla.
