Ha ka jingialang paidbah ong u bah Titos, ka sorkar ka dei ba pyniaid hi ia ka MCCL

Shillong, Lber 27: u Bah Titos W Chyne MDC ka Sohra uba long ruh u CEM jong ka KHADC haba kren ha ka jingialang paidbah ha Saitsohpen mynta ka sngi ia kaba la khot pynlong da ka Save MCCL Campain la kren shai ba ym dei ban ialehkai politic bad iap ka I’m u paidbah.

Haba kren ha katei ka jingialang paidbah u bah Titos u la ong ba ka Mawmluh Cherre Cement Limited (MCCL) ka nongrim ba u ieng naduh kaba sdang ba ka sorkar ka dei ban pyniaid hi ia kane ka karkhana, ba lada kat ka sorkar tang kawei ka karkhana kam lah ban pyniaid kumno kan pyniaid ia ka jylla baroh kawei.

Lada ki karkhana jong ki riewshimet ki lah ban pyniaid ar lai tylli ki karkhana pynmih dewbilat ha ka jylla balei ka sorkar kam lah ban pyniaid wat tang ia kawei kata ka MCCL? Ha kaba ka la pynlut da ki spah klur ia ka Dry Process ha kaba ka dor jong ka jinglut ha kaba sdang ka long tang T.100 klur hynrei haduh mynta khlem lah pyniaid wat la pynlut haduh T.330 klur.

Kumba ka long mynta la sngewthuh ba mynta ka sorkar ka la poi haduh u pud ba ka la rah kti ba ia ka MCCL kim lah shuh ban pyniaid, ha ka jingiakynduh bad ki khlieh nongsynshar bad ka sorkar ka ai ha ki lai tylli ki lad ki lynti ban jied kawei na kita hynrei kila ong balei kin ai ma  ki lad ki lynti, dei ki nongpyniaid phi dei ban jied ia ki lad ki lynti, la pynsngew u bah Titos.

U la ong ruh ba na ka liang jong ka sorkar ka la ong ba kan leit da kata ka joint venture, u ong ba u kwah ba kane ka jingialang kan shim ia ka rai ban phah sha ka sorkar bad lada ka sorkar ka ong ba kan leh noh da ka joint venture to leh noh mynta namar kum ki nongtrei kim lah ap shuh.

Ki nongtrei mynta la jan dap arsnem ki khlem ioh tulop. Lano phin leh kata ka joint venture sha shisnem sa arsnem, lada shim por haduh 2, 3 snem ki nongtrei kin leh kumno kin shu shong sah khlem bam khlem dih, khlem tulop na kata ka daw ka sorkar ka hap ban shim khia ba la kumno kumno dei ban pyndep noh.

Ha kaba na ka liang jong ka Hima Mawmluh ka la pyllait, ka la ong ko sorkar to leh ma phi katba mon ngi ngim ia don kti shuh tngba wat ktah ia ka jaka ka jong ngi bad kumta ka sorkar kam don shuh ban dang pynslem ia ka jingpyntreikam ia ka MCCL.

Kumba ki long kila mad ia kane ka jingeh naduh ka snem kaba la dep nalor ba wan ka khlam Covid-19 la wan sa kane ka khlam dewbilat kaba la ktah ia ka ioh ka kot jong ki paidbah jong kane ka thain. Hooid kiba bun ki ia khnium ki ia ud ba kane ka ju long ha ka thain sohra jong ngi ba ia khnium te ia khnium ia ud te ia ud ynda khot jingialang pat ym ju don ba wan.

Na ka liang jong u nongkhot ia ka jingialang u Bah Joannes JTL Lamare u iathuh ba katkum ka RTI ba u la file na ka liang jong ki, la shem ba ka jingpynmih ia ka dewbilat na MCCL kata jong u snem 2018- 19 ka long haduh 27 metric ton bad ha u snem 2019-20 ka jingpynmih dewbilat ka long haduh 44 metric ton kaba pynpaw ba ka don ka jingkiew ha ka jingpynmih dewbilat na ka MCCL hynrei balei pat ka sorkar ka khang noh da kaba ong ba ka MCCL kam lah ban pynmih dewbilat shuh.

u Bah Welborn Bynnud u ong ba na ka liang ka jong ki kin nym shong thait hynrei kin pynbor ia ka sorkar ba kan pynurlong ia ka MCCL. U ong ruh ba u myntri rangbah ka jylla u Conrad Sangma un nym lah uba bit ban pyniaid ia ka jylla ha kaba tang ia kawei ka karkhana jong ka jylla ruh um lah ban pyniaid.

U ong ruh ba lada ka sorkar ka leh da ka joint venture 70persen na ka pisa yn bei da ka sorkar jylla te kam don jingmut hynrei ka sorkar ka dei ban pyntreikam bad plie biang ia ka karkhana bad ka dei ban pyniaid hi da lade bad kata ka 20 ne 30 persen kan sa wan hi.

U ong ruh ba na ka liang jong kum ki nongkhot ia katei ka jingialang kin sa shong pyrkhat kiei ki lad ki lynti ba kin sa shim ban pynbor ia ka sorkar ban plie bad pyntreikam biang ia ka MCCL.

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet