Shillong, Jylliew 08: U Chairman jong ka NESFAS u Bah Phrang Roy ha ka jingiakren bad ki lad pathai khubor mynta ka sngi ha ophis kane ka kynhun, u la iathuh ba kila leh ia ka jingwad bniah ha kaba ia dei bad ka koit ka khiah jong ki Lyngngam ha u snem 2014 bad ha kane ka jingwade bniah la shem ba kine ki briew ki don ka jingduna ia ki betamin.
La iathuh ba na ka jingwad bniah, la shem ba ka thain Lyngngam ka dei ka jaka kaba duna ha ka jingdon jingbam kiba lah ban tei ia ka met briew, ha kane ka jingshem kala buh ia ki stad wad bniah ha ka jingeh ba balei ka long kumne.
Ha ka jingiakren la iathuh ba hapoh ka jylla Meghalaya ki don haduh 250 jait ki jingthung kiba lah ban pyndon kam ha kaba ban bam ia ki bad kiba long ki jingbam kiba lah ban tei ia ka met jong u briew, hynrei haduh mynta ki paidbah ha ki lum khasi ki dang lah ban pyndon kam tang kumba 30% bad ki Garo ki la lah ban pyndon kam kham bun.
Kane ka jingpynlong ia kane ka iew jong ki nongrep, ka long ban hikai ia ki briew ba kin pyndon kam ia ki jingbam kiba don ha saw jong ki namar kine ki jingbam ki kham tei ia ka met ban ia kaba bam ia ki jingbam kiba la shna ha ki karkhna.
Ha kane ka jingiakynduh la iathuh ba na ka liang jong ka NESFAS kam juh leit ban ong ei ei sha ka sorkar namar ki kwah ba ai ki paidbah ynda kila sngewthuh ia ka jingdon kam kin leit ban ong sha ka sorkar, kaba sngewtynnad ka long ba une u myntri rangbah ka jylla kaba mynta u Conrad K Sangma u la khot ia ka NESFAS ban ia kynduh.
