Shillong, Jymmang 10: Na ka liang u Bah John F Kh
arshiing, Chairman, ka Dorbar Ki Khlieh Nongsynshar Ka Ri Hynniewtrep, kaba kynthup ia ka Grand Council of Chiefs of Meghalaya, ka Federation of Khasi States, ki Dolloi, ki Sirdarship, mynta ka sngi ka sngi kila ai da kajingthoh sha ka sha ka Joint Parliamentary Committee ha Shillong, ha Convention Center, u la buh ia ka jingpyrshah halor ka phang ka jingthmu ban pynkylla ia ka ain nongshong shnong ka Ri India (Citizenship Act 1955), lyngba ka dorkhast hakhmat u Rajendra Agarwal, Chairman, ka Joint Parliamentary Committee On Bill to Amend Citizenship Act 1955 kaba kynthup kumba laiphew ngut ki Member of Parliament.
Ha ka jingkren hakhmat katei ka committee u Bah John F Kharshiing, Chairman, ka Dorbar Ki Khlieh Nongsynshar Ka Ri Hynniewtrep; ka Grand Council of Chiefs of Meghalaya, bad Spokesperson, ka Federation of Khasi States, ki Dolloi, ki Sirdarship) u la kdew ia ka jingdkoh kaba jur jong ka Constitution Ri India, namar ka jingbympaw dur ki Dorbar Shnong, Dorbar Raid bad Dorbar Hima, bad ha kaba ki Hima hapoh ka Federation of Khasi States, ki la juh iai phah mynta la palat 60 snem ia ka jingpynkynmaw man ka por sha u President Ri India, bad ka Sorkar India ban pyndep ia ki jingkular ki jingiateh katkum ki dulir bad ban pynpaw ia ka dulir Instrument of Accession and Annexed Agreement 17 August 1948, (IOA & AA) hapoh ka Article 370 Constitution of India.
La pynsngew ruh ia kitei ki dkhot ka Parliament ba halor ka dorkhast bad hadien ka jingbishar kaba bniah ia ka shithi na ki Khlieh Nongsynshar bad ka Federation of Khasi States, ka National Commission for Schedule Tribes, ha u April 2012, ka la phah ia ka jingbthah sha ka Ministry of Home Affairs, ban shim ia ki lad ban pynbeit bad ban pynrung ia ka dulir IOA & AA hapoh ka Constitution Ri India, hynrei katei ka tnad ka la phah kylla ia katei ka jingthoh bad pan jingshai na ka Sorkar jylla Meghalaya, kaba la phah kylla biang ia ka shithi pan jingshai na ka Khasi Hills Autonomous District Councils(KHADC) naduh 3 tarik August 2012, ia kaba ki bor KHADC haduh kine ki sngi kim shym shim khia ban jubap namar ka jingiatyngkhuh ki bor mar kylliang (conflicts of interest).
La buh hakmat ka Joint Parliamentary Committee, ba ki jingsynshar tynrai “The Tribal Indigenous Institutions of Self-Government” ba la khlieh da ki Syiem, Sirdar, Lyngdoh, Wahadar, Dolloi, bad Nokma) hapoh Meghalaya ki la ia kynduh kiba bun kijingshah thombor lyngba ki AIN kiba bun mynta la palat hynriewphew snem haba ki pyrshang ban pyndep ia la ka synshar, khadar bad ka bishar (Executive, Legislative, and Judicial) hapoh u pud u sam jong ki Hima Elaka ha kaba iadei bad ki Riti Dustur halor ka khyndew ka shiap, ki Khlaw ki btap, ki Um ki wah, Ka dan ka musur, bad ki marpoh khyndew bad kiwei kiwei etc.
La pynsngew hakhmat u Chairman ka Joint Parliamentary Committee, ba haba tang kitei ki jingkular ki jingiateh ha ki dulir ym pat lah ban pyndep wat hadien kiba bun ki jingthoh ki dorkhast, pynban la wanrah ia katei ka jingthmu ban pynkylla bad ka jingpynbeit ban thaw lad ban pynrung ia ki nongwei khar Bangladesh lyngba ka The Citizenship (Amendment) Bill, 2016 hapoh Lok Sabha ha u July 2016 ban pynbeit (amend) ia ka The Citizenship Act, 1955, bad ka long ka jingpynkhien ia ka treaty Instrument of Accession and Annexed Agreement 1th August 1948, bad la pynsngew ba ha ka jingshisha la dei ban weng ia ka Citizenship Act 1955, na ka jingtreikam hapoh ki Khasi States namar katei ka Citizenship Act 1955, ka long kaba khongpong ia ki Riti Dustur jong ngi khamtam ha ka jinglong NONGSHONG SHNONG, ha la ki jong ki jong ki Shnong, ki Raid bad Hima.
La pynsngew ruh ha khmat katei ka Committee ki MP ba katei ka jing long nongshong shnong hapoh ki Hima Khasi States ki long kiba kyrpang namar ki don bun kyrdan ka jinglong nongshong Shnong. (Citizenship Act 1955 is in conflict with Customary Citizenship laws and customs within the jurisdiction and territories of the Chiefs of the Federation of Khasi States as the Khasi States have different categories of citizenship) kum ka nuksa la pynpaw ia ka jingdon i) u khun u hajar; ii) khun soh shnong; iii) khun-soh-syiem; bad iv) u raiot; kiba don la ka jong ka jong ka kyrdan ka jing ioh bynta ha ka jinglong nongshong shnong bad kaba ia pher na kawei ka shnong sha kawei bad ka pher na kawei ka Raid /Hima sha kawei pat bad ym lah ban pdiang ban don tang uwei u nongshong shnong hapoh Ri Khasi Jaintia bad Garo.
Ha kaba pynkut la kyrpad lyngba katei ka Joint Parliamentary Committee jong ka Parliament Ri India, ban pan ia ka kaiphod (report) na ka Government of India, bad ka Ministry of Home Affairs, ba kin pynshai kdar kaei ka daw ba ki pynsahteng ban pyndep ia ki jingkular bad ki jingiateh lyngba ki dulir Instrument of Accession and Annexed Aggrement 17 August 1948.
