Shillong, Kyllalyngkot 24: Mynta shitaiew lynter ki pulit jong ka jylla kila pynlong ia ki jingkhynra ha kylleng ki bynta jong ka jylla ban pynthikna ka elekshon kan long kaba iaid beit iaid ryntih, ki pulit kila pynkhlain bha ia ka jingtalasi ia ki kali ba iaid ba ieng.
Katkum ka jingpyntip jong u Director General ki pulit u Dr. L R Bishnoi ha ka Twitter, la ong ba ha kane ka shitaiew la ioh ban kurup ka pisa kaba lakot sha ka T.15 lak tyngka, ka kyaid 20 hajar litter, Ksiar 570 gram, 238 u herion, 5 kilo u kynja bad 7 tylli ki kali.
Katkum ka jingkhien kaba la ai na ka tnad pulit haba khien lang naduh ka pisa bad ki tiar kiba la ioh ban kurup kala kot haduh T. 3 klur tyngka, kane ka jingioh kem baroh ka long ba ki pulit ki long kiba la pynkhreh bad long kiba la khreh ban na ka bynta kane ka elekshon.
Ki pulit jong ka jylla kila pynlong ka jingpeitngor kaba kham kyrpang ha kane ka por elekshon bad ka jingtalasi ia ki kali ba iaid ba ieing ruh ki la leh kynsan kynsa ha man ki dong kilat ym tang ha ki jaka sor hynrei sha ki nongkyndong ruh kum juh.
