Shillong, Rymphang 06: Ka kynhun kaba jan palat 500 ngut ki Nongsynshar naduh Shnong, Raid bad Hima, na Khasi & Jaintia Hills, ki la ia kynduh ha Pinewood Convention Center, Shillong, por 1 baje janmiet ha ka sngi ba wan u Rahul Gandhi ha Shillong u ba dei u President ka INC, ha ka jingiadonlang u Dr Mukul M Sangma, myntri rangbah ka jylla, u Dr CP Joshi, MP, Gen Secy, AICC bad ha kaba la pyniaid ia ka jingialang da u Bah John F Kharshiing, u Chairman, The Grand Council of Chiefs of Meghalaya, uba la plie ia ka lad ka lynti ban ha kaba la don ka jingiasyllok hapdeng ki Nongsynshar bad u tei u nongialam ba paw jong ka Ri India.
Ka jingiasyllok ka la sdang da Ka jingpdiang da Kaba ieng baroh bad da Ka jingthap kti kaba jam kum Ka Dak ka jingpdiang burom ia u Shri. Rahul Gandhi, MP, & President, Indian National Congress.
Ha kaneka sngi u Bah John F Kharshiing, u la pdiang sngewbha ia u Shri. Rahul Gandhi, ha ka kyrteng jong ki 6300 tylli ki nongsynshar dorbar shnong hapoh Meghalaya, ha ka juh ka por u la ai khublei ia u President ka Indian National Congress bad la maitphang lyngkot halor ka phang ha kaba u la pynpaw ia ka jing sngewnguh ia u Prime Minister u Late Shri Rajiv Gandhi, ia ka jingpyllait ia ka jylla kaba dei ha ka Sixth Scheduled na ka jingshah pynjari ia ka Panchayati Raj, mynba la pynkylla pynbeit thymmai lyngba ka 73rd bad 74th Amendment ia ka Constitution Ri India ha ka 15tarik May1989.
Ia kane la leh kum shibynta ban pynneh pynsah ia ki rukom im ba kyrpang jong ki Khasi, Jaintia bad Garo. U Bah Kharshiing ha kaba kren u la pyntip ha u Shri Rahul Gandhi ba ka long kaba kyrkieh ban thaw ki lad ban pynshai ia ka iktiar, kyrdan, ka jingkitkhlieh jong ki Nongsynshar bad ban pynpaw ia kitei ki hok ha ka Constitution Ri India, khnang ban ai ka bhah ia ki Dorbar hapoh ka Constitution Ri India. U la pyntip ba katto katne ngut ki Nongsynshar kiba don hapoh kane Ka jingialang ki dei kiba la trei ia ka Kam Shnong la kumba palat 25 haduh 35 years.
Ha kaba pan jingshai bad ai jingmut Ki nongsynshar na ki shnong, raid bad Hima ki la pynpaw ia ka jingsngew khia namar ka jingbymdon ka jingbatai shapang ki Dorbar Kur, Dorbar Shnong, Dorbar Raid bad Dorbar Hima, bad Ka long kaba ktah shisha ba haduh kine ki sngi ym pat don ka jingshai halor ki jingsynshar tynrai naduh Dorbar kur, shnong Raid haduh Hima hapoh Constitution Ri India. Ha kawei pat ka liang ka Sorkar ka kyrmen ha ki Rangbah Shnong ban pyndep lut ki kam ki jing bah khlieh khlem jing ioh nong ei ei .
La ioh ruh ka jingai dorkhast na ka Sengbhalang Cordination Committee on International Boundary, (CCIB), bad ha ka juh ka jingialang u Bah Sadon Blah, General Secretary, na ka Hynniewtrep National Youth Front (HNYF), u la kyntu jur na u Rahul Gandhi MP & President, INC, ban shim khia ban pyndep ia ki jingkular bad ban eksamin naduh tyllong ia ka dulir Instrument of Accession bad Ka Annexed Agreement 17, Aug 1948, kaba long ka daw jong ka jingtyngkhuh ki Ain India bad Ka Riti Dustur, u khasi bad Jaintia.
La don ki Rangbah Shnong, sor kiba la pynpaw ia ka jing khuslai jingmut shaphang ka jing bym don ain ka jingbym ithuh ia ki Seng Longkmie bad Seng Samla ha ka BILL VAB 2015 bad ki jing kynthoh bakla Ka Sorkar BJP ia ki Dorbar na ka MHA, bad kaba kham pynbakla ka long ka jingphah pynban u lat sha Delhi ia ki Ain KHADC. da u Lat ba mynshuwa uwei pat u Rangbah Shnong, uba na sor u la kdew ba ka VAB Ka dap da ka jingdunanamar ba khlem ai bynta ia ki longkmie hapoh ka VAB.
Ha kaba jubab u Dr. Mukul M Sangma, Myntri Rangbah ka jylla u la iathuh ba u la leh bad pyrshang katba lah naduh ba mih ka Rai Hukum na ka Hon’ble High court ha kaba la bthah ba donkam ban don ki ain kiba shai ha shuwa ba ki Rangbah Shnong kin trei kam, bad ka Sorkar jylla ka la shim bun ki lad ki lynti ban ia kren bad u la ong ba Ka long kaba donkan ban ioh ia ka jingia sngewthuh hapdeng baroh lai kynhun kaba dei hapdeng ki Rangbah Shnong, ki Autonomous District Council, bad ka sorkar jylla, bad khnang ba kan shai la lum ia Ka jingialang hapdeng ki Rangbah Shnong, KHADC bad ka Sorkar ha ka 14 tarik Dec 2017.
Ha katei ka jingialang Ka la mynjur ban aiti ha ka KHADC ban weng shwa ia ka VAB Bill bad ban phah da ka Bill Thymmai ryngkat bad ban pan bad ai jingmut na ki nongshong shnong, Hima, District Council bad Sorkar jylla. U Chief Minister, u la ong ba na ka liang jong ka Building Bye Laws da Kaba shim ia ki jingbthah ka High Court, badonburom ka Sorkar jylla ka la mynjur ban ai bor ban kyrshan ia ki Town Committee ( to be notified) kiban hap noh ban pynbna da ka KHADC katkum ki kyndon ka Meghalaya Town and Country Act 1973 . Baroh kitei ki kam ki donkam ka jing ia tylli lang na baroh,
U Dr Mukul M Sangma, Chief Minister, u la Pynkynmaw ba dei halor kane ka Kam ba Ka Sorkar ka la thung ka committe kyrpang kaba 50 ngut ki riew dkhot kaba la khlieh da u Dr DD Lapang, kynthup ia ki Nongsynshar naduh Shnong, Raid haduh Hima, bad ki District Council ha u bnai April 2015 bad ka jingbuddien ka dang iaid shakhmat.
U Rahul Gandhi haba u ai jubab ia ki jingkylli bad ki jingaimut, u la ong ba ka seng Indian National Congress Party ka dei kaba burom ia baroh ki bynriew, baroh ki jingngeit, baroh ki jaitktien katkum ka riti ka dustur hapoh ka Ri Khasi bad Jaintia, bad ngi iohi kumno ba ka seng RSS bad ka BJP ki don ki jingiaher jingmut bad Ka Seng Congress shaphang ka Ri ‘’India’’.
U ong ba don kiba ong ba ka Meghalaya kadei ka Ri India, hynrei u la ong ruh ba ki dei ban kynmaw ba khlem ka Meghalaya ka Ri india kam lah ban long ba pura. u ong ruh ba ka congress party barabor ka juh pyntikna ba ki ktien bapher bapher , ki niam , ki riti ki distur bad ki rukum im , ki briew na kane Ka thain lam mihngi ki long kiba bit kiba biang bad ioh ka jiingiada. u ong ruh ba un sa kyrshan ia ka jylla Meghalaya ha kaba ki jingsynshar tynrai hapoh ri khasi kin ioh ia ka jingithuh katkum ki riti Dustur Jong ki jaidbynriew Khasi Jaintia bad Garo.
Haba ai khublei u bah Vincent Pala, MP u iathuh ba u lah leh katba lah naka liang jong u ban iarap ia ki nongmih khmat jong ki nongsynshar ki raid bad ki hima hapoh New Delhi bad katkum ka jingkyrpad ki Nongsynshar u la pan sngi bad por ban ioh iakynduh ia u Shri Rajnath Singh, u Myntri Home Affairs, Sorkar India, mynta la lai bnai bad kat haduh mynta ym pat lah ioh por ban ia kynduh ia u . U lah pyntip ruh ba kum u dkhot jong ka committee kyrpang kaba ia kren ban pynbeit ka khyrnit ba hynriew (sixth schelduled), ha kaba u la shim khia ban plie lad ban pynlong ka jingiakren halor kane ka Kam kum ba khyndai kynta bad la shem ba kiba bun ki riewdkhot MP na ka seng Bharatya Janata Party, (BJP) hapoh ka committee ki pyrshah ia Ka jingtyrwa Jong u halor ka bill kaban pynbeit thymmai ia ka sixth scheldule. La ong u bah John F Kharshiing iing ha ka jingpynlait khubor.
