Ha ka sngi Kyrsiew Ri la thung thymmai ia ki nongkit kam ka seng KSU Mawprem

Shillong, Iaiong 05: Ha ka sngi kyrsiew Ri lane ka Khasi National Awakening Day, kata ka 4 tarik u Ïaiong 2019, ka Khasi Students’Union (KSU) Central Executive Council ka la ioh ban pynskhem bad pynbam smai ia ki nongkitkam ka KSU Mawprem Circle ha Community Hall jong ka Dorbar Shnong Lumkshaid.

Ia ki dkhot jong ka KSU Mawprem Circle la pynbam smai na ka bynta ka samoi treikam 2019 – 2022 da u President ka KSU CEC u bah Lambok Starwell Marngar. Ha kane ka jingpyntian smai la sakhi lem ruh da kiwei ki para nongialam ka CEC kiba kynthup ia u samla Donald V Thabah General Secretary, KSU CEC, samla Biangbor L. Paliar Organising Secretary, KSU CEC, samla Manly Nongpluh Finance Secretary, KSU CEC bad kiwei kiwei ki nongkti kam jong ka seng kmie.

 

Ia ka jingialang ba la pyniaid da u samla Rapborlang Nongrum, la ioh jingkren na u samla Donald V Thabah, bah Rishan Nongsiej, bah David Syiemlieh bad u bah Lambok Starwell Marngar. Ki nongkren baroh ki la kyntu ia ki dkhot ba thymmai ka KSU Mawprem Circle ba kin shakri hok met bad mynsiem ia ka seng na ka bynta ka bha ka miat jong ka Jaidbynriew khamtam ha ki thain Mawprem ha kaba nalor ka jingbuhai shnong ki kiwei ki jaidbynriew  bad mynder ri.

Ha kane ka sngi la kdew ruh ia ki kiwei pat ki jingsniew ha kaba ka jingkyrni ia u drok ka long kaba ha khmat eh. Ki la pynkynmaw ruh ia ki mynnor ha kaba lada don kano kano ka jingiakynad Jaidbynriew ha Shillong, ka Mawprem ka ju long kawei ka shnong kaba shah ktah eh ka shongsuk shongsain namar ka jingbun paid ki bym dei Khasi ha kito ki por.

Ki la pynkynmaw ruh ia ka jinglen lade ki dkhot ka KSU Mawprem ha kito ki por naduh ba la seng ia ka ha u 1987 ban ioh longtrai biang ki Khasi hapoh shnong poh thaw. Kumjuh ruh ki la pynkynmaw ba ka KSU ka la ioh shibun bha ki nongialam kiba ha khmat kiba dei ki nongshong shnong jong ka Mawprem kaba long ka jingsarong ia ka thain Mawprem baroh kawei. Kumta ki la ban biang ia ki nongialam ba thymmai ka KSU Mawprem Circle ba ki dei ban bud ia ki nuksa bad ki matti ba la pruid dak da ki nongialam barim khnang ba ki paradoh parasnam kin shong shngain ha ki thain Mawprem khamtam ha Upper Mawprem bad Mawbah kiba long ki shnong ha kaba ki Khasi ki long ki rit paid.

Ki nongkitkam ka KSU Mawprem Circle ki kynthup ia u samla Arristone Thabah kum u President, samla Badonkupar Nongbri Vice President, samla Sambha Kupar Shylla General Secretary, samla Alexander Mutyen Assistant General Secretary, samla Raplang Dhar Education Secretary, samla Pynshngain Bantei Marwein Assistant Education Secretary, samla Nangsandor Ryntathiang Organising Secretar, samla Ricky Pathaw Assistant Organising Secretary, samla Anrose Nongbet Publicity Secretary.

Nalor  kitei ki nongkit kam la jied sa 25 ngut ki nongkti kam bad ka jyli treikam jong ka KSU Mawprem Circle kan kdup ia ki shnong Lower Mawprem, Upper Mawprem, Mawbah, Dymmiew, Lama Villa bad Lumkshaid.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet