Shillong, Naitung 29: Ka jingialang jong ka PDF kaba la long mynta ka sngi ha conference Hall jong ka KHADC kala shim ia ka rai ban bthah ia ka Executive Committee ba kan shong bishar bniah biang sa shisien halor ka rai jong ka Executive Committee ban ai NOC na ka bynta ban shna ia ka surok two lane.
Haba kren ha ki lad pathai khubor ha dien ba la wai ka jingialang, u Chairman jong ka PDF u Bah PN Syiem u la ong ba ka PDF kala shim ruh ia ka rai ban khot ia ka jingialang ha ka sngi nyngkong kata shitarik jong u Nalur ia ki seng bhalang kiba kyrshan bad kiba pyrshah surok, ha kane ka sngi ynkhot lang ruh ia u Bah Pynbiang Sing Syiem bad ia ka kong Telenia Thangkhiew ki MDC jong ka HSPDP.
Ha kane ka jingialang yn khot 10 sngut na ka liang pyrshah ia ka surok bad shiphew ngut n aka liang ba kyrshan ia ka surok bad baroh ki dkhot jong ka PDF kin ia donlang ha katei ka sngi bad ka jingialang kan long ha ka por shibaje nohphai sngi la sngi nyngkong.
U Bah PN Syiem u la ong ba kat kum ka kaiphot jong ka komittee ba kyrpang kaba la thaw n aka bynta katei ka surok kala ai ba ia kiwei kiwei ki ptoject kan don kano kano ka jingujot, hynrei ia ka surok na Wahkaji sha Mawthabah da lei lei ym dei ban ai NOC.
Ka PDF kala shim ia ka rai ba ka jingbishar bniah biang ha kaba ia dei bad ka rai jong ka EC kan long tang ia ka surok na Nongstoin lyngba ka Rangblang sha Wahkji. La iathuh ba baroh ki project kiba don ha Khasi hills ki don phra tylli bad kaba kin hap ban peit bniah kan long tang ia katei ka wei na.
Halor kane ka rai jongka PDF , ka EC kan sa shong ban ia kynduh ha dien ba kila dep ban ia kynduh ia ki seng bhalang kiba pyrshah bad kiba kyrshan bad kaei kaba mih na kane ynsa rah sha ka EC ban ia kren halor kane ka kam.
