Shillong, Jylliew 16: U bah Prestone Tynsong Symbut myntri rangbah ka jylla mynta ka sngi u la pyntip ba ka sorkar kala shim ia ka rai ban sdang plie noh ia ka Iewduh naduh ka sngi nyngkong ban wan kata ka 22/6/2020.
Haba kren ha ki lat pathai khubor mynta ka sngi u la iathuh ba katkum ka jingkhein kaba la ioh na ka DC ka long ba ki dukan kiba la lah ban plie ia mynta ki long tang 1220 tylli ki dukan ha Iewduh bad ia kine ki dukan yn plie ha ka shi sngi tang 30% lane 33%.
Da kane ka jingkhein jong ka sorkar ka long ba ha ka sngi sngi ki dukan kiba la lah ban plie ia ki dukan ha Iewduh ha ka shisngi kin long 402 tylli, ka jingplie ia ki kan long pud sngi. Ia kane ka jingkhein la shim ha dien ka jingiamir jingmut ha pdeng ka DC, ka KHADC bad ka ophis jong u Syiem ka Hima Mylliem.
Haba jubab ia ki jingkylli u bah Prestone u la iathuh ba ki bynta jong ka Iewduh ia kaba kim pat shah ban plie ki long, ki basa diew Kwai, basa die Tympew, basa die doh Masi bad doh Sniang, ki Basa khur bad ka basa die Dohkha ia kine ki jaka ym pat shah ban plie ia mynta.
U Synbut Myntri Rangbah u la ong ba kane ka long tang ka jingsdang ban plie ia ka Iewduh, na ka liang jong ka District Adminstration, u Syiem ka Hima Mylliem bad ka KHADC kin peit bad kin hap ban phah ia ka kaiphot man ka por khnang ban peit lada lah ban plie sa ia kiwei ki jait dukan.
U Symbut Myntri Rangbah u la ong ba baroh ki hap ban but ia ki kyndon kiba la buh da ka sorkar. Kane ka jingialeh pyrshah ia kane ka khlam kam dei tang jong ka sorkar ne jong ka ophis jong u DHS hynrei ka dei ka jinglang baroh, mynta kala iaid lai bnai tam baroh kila sngewthuh kumno ban iada da lade ia lade.
