Shillong, Naiwieng 24: U Shongknor jong ka kynhun Meghalaya Democratic Alliance (MDA) u Conrad K Sangma ba dei ruh u myntri rangbah jong kane ka sorkar synroplang u la khot ia ka jingialang jong ka MDA ha ka 26th Naiwieng 2020, kata ha ka sngi palei.
Ka jingkhot ia ka jingialang jong ka kynhun MDA, kaba don lang ia ki hynriew tylli ki seng sain pyrthei, ka NPP kaba ialam ka sorkar, UDP, BJP, HSPDP, PDF, KHNAM, NPP bad ki MLA shimet kam long kaba thymmai hynrei kaba juh long na ka por sha ka por ban ia kren kum ki party kiba ia don lang ha kane ka sorkar synrop.
Ki thymmei khubor ki iathuh ba ka jingkhot ia kane ka jingialang jong ka MDA ha ka sngi Palei kan long kaba kham kyrpang namar ba ki nongialam jong ka party BJP, lait noh ia ki ar ngut ki MLA kiba don ha ka sorkar kila kynnoh pyrshah ia kane ka sorkar ha kiba bun ki liang.
Ka jingkhot ia ka jingialang jong ka MDA kum ka kynhun synroplang ka long ba ki party kiba don hapoh kane ka sorkar kin pynsngew ia ki jingeh jong ki kaba ki don hapoh kane ka kynhun ha kaba ki President jong ki party kin ia don lang ha kane ka jingialang.
Mynta ka sngi u National Vice President jong ka party BJP ba dei peit ia ka jylla Meghalaya u M. Chuba Ao u la wan poi ha kane ka nongbah Shillong ha kaba u la ia kynduh ruh ia ki nongkit kam jong ka party.
