Shillong, Jymmang 21: Ka seng HYC mynta ka sngi hapoh ka jingialam jong u president ka seng u Bah Roberjune Kharjahrin kila leit ai da ka jingthoh sha ka kong Telinia Thangkhiew Deputy CEM jong ka KHADC kaba dei ruh ka chairperson jong ka committee Village Administration Bills.
Ha kane ka jingai jingmut jong ka seng HYC sha ka Kommittee ba dei bad ka VAB, na ka liang jong ka seng kala buh ha duh jhatkhyndai tylli ki phang ba dei ban pynrung ha ka VAB. Ka mat kaba ha khmat eh ba ka HYC kala buh ha kane ka jingthoh ka long ba ka VAB, ka dei ban batai shai kaei ka jingpher hapdeng u trai shnong bad u nongwanshong shnong.
Ha kane ka jingai jingmut ka HYC, kala ong ba dei ban ithuhnoh da ka ain ia ki seng long kmie, kis eng samla ha ki shnong ki thaw bad dei ban da batai shai kaei ka kam ka jong ki kaba ki ki dei ban leh hapoh ki shnong ki thaw kaba ki don.
Ha ka VAB dei ban pynrung ia ka jingbuh ia ka iing bihsar ha ka shnong , ia kane ruh dei ban da batai ia ki bor trei kam jong ka. Ha ka VAB dei ban pyntung bad batai ia ka bor jong ka shnong ha kaba ia dei bad ka jingpyniaid beit iaid ryntih ia ka shnong ka thaw.
Haba ia dei bad ka jingdon ia ka Village Development Council don kam ban pynkylla ha kaba u rangbah shnong u dei ban long u shongknor jong ka committee bad tang ki khasi kiba dei ki nongshong shnong ki lah ban ia shim bynta bad ha ki jaka bym don ki rangbah shnong Khasi u khlieh jong ka hima u dei ban peit namar ki jaka ki hap hapoh ka jingpeit ka jong u.
Haba ia dei bad ki bor jong u rangbah shnong ha kaba ia dei bad ka jingai ia ki sertiphiket bapher bapher u rangbah shnong bad u secretary shnong ki dei ban da ioh ia ka jingmynjur jong ka committee shnong bad ka dorkar shnong ka dei ban pyntip sha KHADC bad kum juh sha u khlieh jong ka Hima.
Kiwei kiba kiba ka HYC kala ai jingmut sha kane ka committee ka long ba ki nongkit kam shnong dei ban da don ka jingpynsmai. La ai jingmut ruh ba ia ki nongkit kam shnong dei ban don ka jingsiew. Ka HYC kala pashat jingmut ba dei ban don ruh ia ka tribunal ha poh ki shnong ki thaw bad ia ka rai kaba la rai da ka tribunal ym dei ban pynkylla pat da ka Executive Committee.
Ka HYC kala ai jingmut ruh sha ka committee ba ia u rangbah shnong la dei ban buh noh ka kyndon ha kaba ia dei bad ka kyrdan pule bad la kumno kumno u rangbah shnong u dei ban long u ba la pass ia ka klass X shaneng.
