Ha kane juk kyrduh kam dei ban don ia ka polisi ha ka rep ba kan long ka lad ai kam:KSU

Shillong, Naitung 25:  Ka jingud jingnam bad jing lynñiar ki Nongrep kiba long ki nong pyndap marbam mardih  ka long naka por shaka por namar ka jingtad dor palat pud ki mar rep kala pynduh mynsiem bad buh jingeh haduh katta katta iaka jingim jong ki.

Ka long kaei kaei kaba sngewsih ban iohi ba bun ki Nongrep ki jaw syep jaw snam haba trei shitom naka bynta ban rep Synsar, Sying, Sohsaw, Phan, Phulkubi, Kubi bad kiwei kiwei ki Mar Rep hynrei ynda ladei kapor ban lum ban lang ban wanrah sha Ïew sha Hat naka bynta ban die kihap ban die haka dor kaba tad kaba ym iahap shuh bad kador jong ka jingtrei shitom jongki.

ymlah ban len babun naki Nongshong shnong ka Jylla khamtam na Nongkyndomg ki Shaniah shisha haka Rep ka Riang kum ka lad kamai Ja kpoh ban pyndap pynbiang iaka Ïing ka Sem bad ban phah skul ruh iaki Khun ki Kti jong ki hynrei haba ki Mar Rep baki pynmih naka jingtrei shitom jomg ki kihap ban shu die tad noh ynda lapoi ha Ïew kane kala pynlong pynban iaki Nongrep ban sngewsih kthang bad ban kynduh shibun ki jingeh haka jingim ka jong ki.

Ha kaba iadei bad jinglong man  ki Mar Rep bad ka Dor ka Mur ki Mar Rep kiba mih na Jylla bad bawan na shabar ka jylla kala pher bak lybak, kum ka seng ka sngew ban buh jing kylli ba balei bad na kaei kadaw lada wan ki Mar bam na shabar ka Jylla ki Nongthied nongpet kihap ban thied haka dor kaba Rem, lada mih pat ki Marbam naka jylla kilong pynban kiba tad haduh katta katta.

Naka liang ka Seng ka kyrpad bad kyntu jur iaka Sorkar ban iarap bad peit Kyrpang iaki jingeh ki Nongrep laka long haka ” Jing shah lynshop bad pynjulor ki jingrep haka bor jong ka Mariang (Natural Calamity) bad iaka Dor ka mur (Prices) jong ki Mar Rep ha Ïew ha Hat bad lada ka Sorkar kam don jing kitkhlieh halor kane ka jingkam ka Sorkar baka don jingthmu bad jing angnud ban kyntiew iaka rep ka riang kan shu long pynban tang ki Ktien kai.

Ha kum kane ka Juk kyrduh kam kyrduh jam kaba mynta ka Sorkar kala dei ban thaw ki Lad ki Lynti kumno ban kyntiew shisha iaka rep ka riang khnang bakan long shisha kum ki lad kamai ja kpoh ki Nongrep bad ki lad ai kam aijam iaki Samla bad ban kyntiew ruh iaka ïoh ka kot jong ki Kup Shiliang sem shiliang, la ong u samla Reallystar Nongspung Chairman ka tnad jong ki nongrep hapoh ka seng kmie ka KSU.

 

What Next?

Recent Articles

Leave a Reply

Submit Comment

*