Shillong, Iaiong 03: Ka jingialap ilekshon sha ka iing dorbar jong ka GHADC ka ban long ha ka 12 tarik mynta u bnai kala dang iaid sha khmat bad ki party kiba la pynieng kyrtong ki long ka NPP, Congress, UDP, NCP bad ka BJP kynthup ia ki kyrtong shimet.
Katkum ki jingtip kiba la ioh lum da u SP News Agency, ha kaba ia dei bad katei ka ilekshon MDC ha GHADC, haduh ba thoh ia kane ka khubor dei tang ka party BJP kaba la pynmih paidbah ia ki kular ilekshon katba kiwei ki party haduh mynta kim pat pynmih ia kita ki kular ilekshon.
Haba kren ia kren bad u state president jong ka party BJP u bah Ernest Mawrie u la kubur ba ka dei ka jingshisha ba dei tang ka BJP kaba la pynmih ia ki kular ilekshon bad u la ong ba lada ka BJP ka ioh ban thaw ia ka EC ha GHADC kan pyntrei kam ia ki kular kaba la khlei paidbah.
Haba ia dei bad ka jingialap ielskhon la ong ba ki paidah ha Garo Hills kila pdiang ia ka party BJP bad ki sngewthuh ba ki paidbah ki tip kaei ka party BJP lyngba ki skhim kiba ka sorkar u Modi kiba la pyntrei kam ha baroh kawei ka Ri India ha kaba ki ruh kila ioh bynta.
Na ka liang jong ka party BJP ka don ka jingkyrmen ba ki paidbah kin ai ka jingshaniah ia ka BJP namar ki paidbah kila dep ban mat ia ka party Congress bad NPP hapoh jong ka GHADC bad mynta ki don ka jingkyrmen ba ka BJP kan jop kham bun ki MDC.
