Ha kane ka sngi kyrpang jong ki samla na ka liang jong ka Khun Hynniewtrep National Awakening Movement State Youth Wing, ngi ai khublei kyrpang ia baroh ki samla jong ka jylla da u bah Thomas Passah

Ha kane ka sngi kyrpang jong ki samla (National Youth Day) na ka liang jong ka Khun Hynniewtrep National Awakening Movement State Youth Wing, ngi ai khublei kyrpang ia baroh ki samla jong ka jylla. Hynrei ai  ba kane ka sngi kan ym long tang ka sngi ban ia leh kmen namar ba ka sorkar kan pynlong ia ki tamasa ba ha rukom, hynrei ai ba kang long ka sngi ba ki samla ka jylla kin puson, kin kylla thiah kylla dem, kin kyndit bynriew ban wanrah ia ka jingsdang jong ka jingkylla ba shisha. Ka por samla kadei kapor kaba biang tam ban trei minot, ban trei khia bad ban pynthikna ia ka lawei ba phyrnai na ka bynta ialade bad kumjuh na ka bynta ka jylla hi baroh kawei. Ki samla kidei ki budlum jong ka iing ka sem ka snong ka thaw bad ka jylla baroh kawei, hynrei la iohi ba une u budlum u la nang tlot, nang duh jingkyrmen, ka ban long ka jingma pat ia ngi kum ka jylla.

(1) Da ki phew lak ngut ki samla ba la nang la stad kim don kam don jam, ia kane lah ban pynshisha haba ngi iohi ia ki phew hajar ngut ki samla ki ba apply ia tang 2/3 tylli ki post ba lait ha ki tnat sorkar. (2) 70% na ki samla ka jylla ki dei na nongkyndong (Rural Youth) bad la iohi ba kine ki samla (Rural Youth) ki la hap ban shu shniah tang ha kata ka Mahatma Gandhi Natinal Rural Employment Guarantee Scheme (MGNREGS) kaba ngi juh khot ka scheme 100 sngi. (3) Ka jylla Meghalaya ka long kaba bun eh ki samla ki ba pyndon dam ia u drugs, bad ha u snem 2013 – 2016 la registered haduh 112 tylli ki case  hapoh ka Narcotic Durgs and Psycotropic Substances (NDPS) Act khlem da khien ia kiba khlem register. (4) Ka jylla Meghalaya ka la mad ia ka jingkiew stet jong ki briew ki ba ioh ia u khniang jingpang HIV katkum ka kaiphot jong ka Meghalaya Aids Control Society. (5) Naduh ba ngi la ioh ia la ka jong ka jylla ngim pat don ka State University, ka Medical College etc. (6) (7) Haduh 70% na ka jylla ka jong ngi, ki dei ki nongkyndon ki bym don  kano kano ka jingbit jingbiang halor ka lynti ka synkieng, ki jaka sumar, ki jaka pule puthi ter ter kaba pynlong ia ki samla ban pher wir sha sor bad sha kiwei pat ki jaka naka bynta ka pule ka puthi bad ka wad kam wad jam. Ki samla na sor bad ki samla na ki longing ba don ba em ki leit ban shong bad sah sha kiwei pat ki jylla ka ri India khlem da kwah ban wan phai biang ban wad ia ka pule ka puthi bad ia ka kamai ka kajih.  Hato kine ki jinglong jingman kumba la kdew haneng (bad kiwei kiwe khlem da kdew lut) kidei ki jingsarong ne kidei kiei kiei ki ban pynkyndit pynriew bad kyrsiew thiah ia ngi kum ki samla ka jylla.

Ha u snem 2020 ia ka ri India yn tip kum ka Ri kaba samla tam ha ka pyrthei (Youngest Country) namar haduh 64 % na ki nongshong shnong jong ka ri India kin dei ki samla ki ba hapdeng ka rta 19-24 snem. Ka Election Department ka la pyntip ba don haduh 8 lak tam ki nongthep vote sha ka MLA election 2018 kaba kynthup ia ki 3 lak ki ba thymmai, bad kane ka kdew shai ia ka jingkiew jong ki samla ha ka jylla ka jong ngi ruh kumjuh. Naka ta ka daw ki samla jong ka jylla kin hap ban puson bad ban shimkhia bad ban sngewthuh ia ka jingkit khlieh ban ialam ia ka jylla shakhmat ha baroh ki liang,

Ban wanrah ia ki jingkylla ba shisha bad ban khanglad ia ki riewshim kabu, ki samla kidei ban jan bad ban ia shim bynta ha ki kam politik ym da ka jingshong shit hynrei da ka jingkit khlieh, ym da ka mynsiem khwan myntoi hynrei da ka mynsiem len lade ban pynthikna ia ka jingkhuid jingsuba ha ka kam sain hima sima ka jylla. Ka jingshisha ka long ba ki samla kim lah ban shu phai da ka lyngkdot ia ka politik, hynrei dei ban tur shaprhang, ban kylli jingkylli, ban puson, ban ia tynjuh lada ngi kwah ia ka lawei kaba khuid bad kaba don jingkyrmen. Ka jingjngai bad ka jingkyntait jong ki samla na kane ka kam ka ai mynsiem bad ai lad ia ki riew shim kabu ban synshar ia ngi bad ban pynsniew ia ka lawei ki pateng ban wan. Ngi la heh ka rta kum ka jylla ngi ka kot sha ka 46 snem bad ngi ladei ban pyrkhat sani bha kumno ngin iaid nangne sha khmat, ngi dei ban buh ka thong ba shisien ka sngi ka jylla jong ngi kan ieng hala ki jong ki kjat (da lade ia lade) bad kane kadei ka kamram ka jong ngi kum ki samla bad ai ba ngin long ka jingkylla kaba ngi ngi thrang.Thomas Passah President KHNAM State Youth Wing

 

What Next?

Recent Articles

Leave a Reply

Submit Comment
*