Khanduli, Risaw 03: Ka thian Khanduli ka dei ka jaka kaba ka sorkar Meghalaya bad ka sorkar Assam ki shim ba ka don ha ka jingiaknieh pud bad ka jylla Assam ia kaba la tip kum ka Block-I bad ha kane ka thain ki juh mih ki jingiakjaia kaba man ka por.
Kiba poi sha Khanduli ki lyngoh ban iohi ba ha kano ka rukom ia mynjur ka Meghalaya bad ka Assam ia ka jingbuh khyrdop pulit ha khanduli, ia kaba ki paidbah nongshong shnong ruh kim sngewthuh shuh.
Haba u SP News Agency u la leit sha katei ka thain Khanduli la iohi haba leit na Meghalaya sha Assam kan don shuwa ka khyrdop jong ka jylla Assam ha kaba ki don ki pulit kiba ap bad haba la iaid kham sha khmat ka don ka khyrdop ki pulit jong ka jylla Meghalaya.
Lada wan pat na Assam kaba hap hapoh jong ka Karbi Anglong sha jylla Meghalaya lap shuwa ia ka khyrdop ki pulit ka jylla Meghalaya bad ynda la rung kham sha khmat ka don sa ka khyrdop jong ki pulit ka jylla Assam.
Ka jingia buh ia kine ki khyrdop jong ki pulit na ka jylla Meghalaya bad Assam ha Khanduli ka la long la bun bun snem mynta bad kane ka dang neh ha kane ka juh ka rukom ba la da leit na Meghalaya poi shuwa sha ka khyrdop ki pulit Assam bad lada wan na Assam poi shuwa ka khyrdop pulit Meghalaya.
Ka jingiakren ia ka jingia kajia pud ha kaba ar ngut ki myntri rangbah kila leit ban iuh kjat ha katei ka jaka ka long u Prafulla Kumnar Mahanta jong ka jylla Assam bad u bah Evansius Kek Mawlong ha Madan kynjatboll Khanduli ha u snem 2000.
