Ha khmat u MLA ka Congress ud ki nongrep ba dang shah ot kilo ha iewduh

Shillong, Rymphang 13: U Bah Himalaya Shangpliang MLA jong ka Mawsynram ba dei na ka seng Congress u la leit sha Iewduh ban ia kynduh ia ki nongrep ban sngap ia ka jingeh ka jong ki kaba ki ia kynduh ha katei ka iew kaba ki leit ban die ia ki marrep ka jong ki.

Ha kane ka jingleit kila don ki nongrep kiba la pynsngew ia ka jingud jingnam jong ki ia ka khia ka shon kum ki nongrep, u bah Aibok Kharsanoh na ka shnong Thangsning u la pynpaw ia ka jingeh ba ka jingot kilo ka dang iai beteng haduh mynta hapoh katei ka iew.

U Bah Har Basalormaw ba dei na ka shnong Umsning, u la iathuh ba ka jingeh ka long ba kim ioh ia ka sboh dawai na ki ophisar sorkar katkum ka jingdon kam bad kaba bun ki hap ban thiew na iew bad haba ia dei bad ka jingot kila la ong ba na ka 10 kilo ki ot shikilo.

U Bah Shot Kharjana na Umlyngka u la ong ba lada khein ia ka jinglut ha kaba ia dei bad ka rep sohsaw kaba  u la rep mynta la 20 snem ei ei, ka jinglut ha ka shikilo kala kot sha ka 20 tyngka bad haba ki wan die pat ka long ha pdeng 22 tyngka bad 30 tyngka. Ia ki symbai ruh kim juh ioh thikna ba dei jong ka sorkar.

Ladon ruh kiwei kiwei kiba la pynpaw ia ka jingeh kum ka jingjaboh jong ka iew ka jingkhang ngaih khatam ha ka por ba mih ki jhur na kane ka jylla Meghalaya bad jingkiew ka bai musur kaba la shim da ka hima mylliem.

Na ka liang jong u MLA ka Mawsynram ha dien ba la ia kynduh ia ki nongrep u la ong ba ia kane ka kam yn sa rah hapoh ka iing dorbar thawain ka jylla ban ia kren ia ka jingeh ka jong ki, u la ong ba u myntri ka tnad rep u bah Banteidor Lyngdoh u la de ban wan jngoh ia ka iew bad u dang pyrkhat ba kala don ka jingkylla hynrei ka dang neh kumjuh.

Haba ia dei bad ka jingkhuid jong ka iew u la ong ba u la iohi ka jingjaboh kaba u la wan mynta ka sngi, na ka bynta ka jingkoit jingkhiah ki paidbah na ka liang jong ka Hima Mylliem ka dei ban sumar khuid ia kane ka iew bad kum juh ki paidbah kiba pyndon kam ia ka iew ki dei ban leh khuid.

What Next?

Recent Articles

Leave a Reply

Submit Comment

*