Shillong, Kyllalyngkot 05: Mynta ka sngi ki nongialam jong ka seng KSU na Ri Bhoi District kila rah lama ha khmat jong u myntri ka tnad rep ka sorkar pdeng u Narendra Sing Tomar ha ka jingwan jong u ha ka College of Agriculture kaba don ha Kyrdemkulai Ri Bhoi District.
Kane ka jingrah lama jong ka KSU ha khmat jong u myntri ka sorkar pdeng ka long ba ha u snem 2010 ka sorkar pdeng kala kular ban buh ia ka Central Agricultural University ha katei ka jaka da kaba pan jaka na ka sorkar jylla 200 akar bad ka sorkar jylla kala pynbiang.
Hynrei kaei kaba la jia ka long ba ha dien ba ka sorkar jylla kala ai ia ka jaka, ka sorkar pdeng kala buh tang ia ka College of Agriculture bad ia kane la pynhap hapoh ka Central Agricultural University ka jylla Manipur, kane kala pynkhei ia ka kular kaba la ai ha u snem 2010.
Ha kane ka sngi kala KSU kala iai bteng ban bud dien ia kane ka kam ban dawa na ka sorkar pdeng ba dei ban buh iaka Central Agricultural University ha katei ka jaka ym ia ka college, naduh u snem 2019 ka seng KSU kala bud dien ia kane ka kam ha kaba kala leit sha Delhi ruh hyrnei ki khlem ioh ia kynduh.
Ha dien kata kila ia kynduh ia u myntri ka tnad rep ha Guwahati ha kaba kila ai ia ka dorkhas ha katei ka jingiakynduh ha u snem 2021 hynrei haduh mynta ka sorkar pdeng kam shym leh ei ei bad mynta ka sngi ha ka jingwan jong u sha katei ka jaka ka KSU kala pynlong ia ka jingiapyrta ban dawa ia ka Central Agriculture University.
Ha kane ka sngi ka KSU kala pdiang burom ia u mytnri ka sorkar pdeng da ka jingrah ia ki lama bad ki jingthoh ha baroh ar liang ka surok ha kaba u wan hapoh katei ka College kaba don ha Kyrdemkulai ban pynpaw ia ka jingkwah ba ka sorkar pdeng ka dei ban ai iaka Central Agricultural University yn pynkylla ia kaba la kular.
