Shillong, Nohprah 13: U Bah Banshai Dkhar nodal ophisar jong ka Indian Oil Corporation (IOC) u la ong ba ha ka Ri India baroh kawei ka don ka jingkhot aplikoshon ia kiba kwah ban pyniaid ia ki petrol pump baroh ki long haduh 56,000 tylli bad na ka bynta ka jylla Meghalaya ki long haduh 238 tylli.
Haba kren ha ki nongthoh khubor mynta ka sngi ha Shillong Press Club u la ong ba kane ka dei ka kabu ia ki samla jong ka jylla Meghalaya ba kin apply namar kaba kong san kan long ka jaka bad ki bym don jaka ki lah ban shu shimwai ruh kam don jingpher ei ei.
La ong ba kane ka long ka kabu namar kan nym don shuh kata ka jingkhot aplikoshon na ka bynta ki shiphew khatsan snem ban wan. U kyntu ia ki samla kane ka jylla Meghalaya ba kin wan sha khmat ba kin apply ban buh ia ki petrol pump.
Kito kiba kwah ban apply ki dei ban apply on line bad ka tarik kaba khatduh kan long ha ka 24 tarik mynta u bnai, la ong u bah Banshai Dkhar nodal ophisar jong ka IOC mynta ka sngi.
