Shillong, Nailar 31: Ka seng KSU ka kyntu ia ka sorkar ba kan shim khia ban pyrkhing ia ki khappud bad shapoh jylla ruh ban khanglad ia ki mynder ba kin ioh rung ha jylla Meghalaya.
Kane ka jingkyntu ka wan hadien ba ka jylla Assam ka la pynmih paidbah ia ka thup ba khatduh jong ka NRC ha kaba haduh 19 lak tam ki briew kim shym la paw kyrteng ha kane ka thup kaba mut ki la shah khein kita ki mynder lane ki poiei ha jylla Assam.
Namar ka jingjrong u khappud jong ka Assam bad Meghalaya uba kot kumba 900 km bad ka jingtlot ki ain pyrkhing mynder ha jylla Meghalaya, ka don ka jingsngewthuh ba kine ki 19 lak ba kin rung sha ka jylla , pynsngew ka KSU.
Ka KSU ka ai jingmut ia ka sorkar ba namar ka jingslem ban pynieng ia ki khyrdop Entry bad Exit Point, kan bha lada pynieng shwa da ki khyrdop ba shipor ha shi lynter u khappud ban talasi mynder bad ban kham pynbun nongpahara ha ki “infiltration check gate”.
Ka KSU ka kyntu ruh ia ki dorbar shnong, ki seng samla bad ki VDP ba kin long kiba peit pyrman ban ym ailad ia ki briew nongwei bym dei Khasi ba kin wan shong shnong ha ki jaka ne shnong jong ki. Wat lada kine ki briew ki don EPIC hynrei haba kim don ha ka thup NRC ka mut ka EPIC ka jong ki kam treikam shuh.
Khatduh khatwai ka KSU ka la dep kyntu ia ki tnad treikam jong ka ba kin pyrkhing bha ha ka kam talasi mynder bad ka KSU North Khasi Hills District Unit lem bad ka KSU Jaintia Hills District Unit ki pyrkhing bha ha u surok bah Shillong- Guwahati bad Jowai-Silchar maduh mynta ka sngi.
