Shillong, Jylliew 07: Ka shnong Balat ka dei kawei na ki shnong kaba la paw nam bha bad baroh ki briew ki tip ia ka kum kawei na ki jaka khaii pateng ha khappud naduh ki por ba ka Ri India kam pat ioh ka jinglaitluid, hynrei ka shnong Balat ka dei kawei na ki jaka khaii pateng hapdeng ki Khasi bad ki briew jong ka Bengal, ia kaba mynta la tip kum ka Bangladesh.
Ka jingkhlong jong ka Wah Umngi iaka ruh jong ka shnong Balat ka long la da ki bun bun snem suk suki bad ha kine ki 10 snem kiba la leit kumba 70 tylli ki iing tam ne dukna ruh kila sah rong ha ka um man ka por lyiur bad mynta ka lyiur ruh kala rah shiteng jong ka iew kaba la shna da ka sorkar kum ka market complex. Ka shnong Balat mynta ka hap hapoh jong ka South West Khasi Hills District.
Ha ka jingwad jingtip jong u SP News Agency da kaba ia kren bad ki trai shnong na Balat, kila iathuh ba kitei ki iing kiba la shah rong ha ka um ka long kawei ha dien kawei bad ka jingkynriah jong ki nongshong shnong ka long ba ki ia tur sha jan ka iew bad kane ka shnong mynta kam jngai shuh na ka wah ka long sa tang kumba 20 metter ei ei.
Kane ka shnong Balat haduh mynta ka dang don kumba 150 tylli ki long iing kiba sah bad kiba bun ki long ha jan iew, kane ka shnong ka dei ka shnong kaba ia shong khleh bun ki jaidbynriew bad haduh mynta ka nam jong ka iew Balat ka dang sah dang neh bad ka iew ka juh long man ka sngi Nyngkong.
Ki trai shnong kila iathuh ruh ba ha kine ki san snem na ka liang jong ka sorkar kala phah ia ki engineer na ka por sha ka por ban peit kumno ban iada ia kane ka shnong na ka jingshah khlong ha ka wah Umngi ha man la ka por slap, kila don ruh ki kompeni na Kolkatta kiba wan ban jurip ia kane ka wah kumno ban leh.
Kila don ka jingbuh maw ha jan ka shnong Umpung ban ialeh ban wanrah ia ka jingkynriah ia ka um na kane ka wah Umngi da kaba buh ia ki mawthup hynrei namar ba khlem buh ia ka jar nar ia kaba la tip kum ka spur ka um ka juh rong noh. Ki nongshong shnong jong ka Balat ki kwah ba kan don ka jingiada kaba pura ban ka shnong Balat kan nym jah kyrteng na kane ka sla khyndew.
Kiba bun na ki long iing kiba la shah ktah ha ka jingshah rat ki iing jong ki ki kylla shong wai hapoh ka shnong Balat, ki don kiba la phet sha ka shnong Laitmynsaw bad sha ka shnong Umsawrang ki shnong kiba don shaneng jong ka shnong Balat.
