Shillong, Jymmang 27: Mynta ka sngi ka long ka sngi sah kynmaw ia ka Nongbah Shillong ha kaba u myntri rangbah duh jong ka Ri u Narendra Modi u la kren kumno ba kane ka sorkar jong u kan leh naka bynta ban kyntiew ia ka ioh ka kot jong kane ka thain shatei lam mih ngi jong ka Ri India.
Ha ka jingkren ka jong u sha ki paidbah ha kane ka sngi u la ong ba kane ka thain ka don shibun ki lad ki lynti kumno ban kyntiew ia ka ioh ka kot bad u la ong ba kane ka jaka kan long ha jingkhang bah sha kiwei ki ri jong ka dewbah Asia kaba shathi.
Dei na kane ka daw ba ka sorkar pdeng kala thaw iaka “ Act East Policy’ ban pynurlong ia kane don kam ia ki surok, ki lynti Rel bad kikad liengsuin bad kane ka sorkar kala rai ban kyntiew iakane ka thain ha ki liang baroh.
Ka sorkar jylla Sikkim kala ioh ia ka kyrdan ba kala pynmih ia ki jingbam kiba khlem khleh dawai bad kane ka thain kan long ka shang bam jingbam ia ka ri india ban ong ba ki jingbam kiba mih na kane ka thain kin long kiba khlem khleh dawai, kane kan iarap ia ki briew kane ka thain ban kiew ha ka ion ka kot.
Haba phaisha ka jylla Meghalaya u la ong ba ka jylla ka don shibun ki rangialehkai kynjat boll kum Eugeneson Lyngdoh, Aibor Khongjee and Marlangki Suting kiba la wan rah burom ia ka ri kum juh bad na kane ka daw la mang T.48 klur ban kyntiew ia ki kam ialehkaiha kane ka thain.
Shuwa ban kren sha ki paidbah u myntri rangbah duh jong ka Ri u la khaweh lama ia ki tylli ki lynti rel ha kane ka dong shatei lam mih ngi jong ka Ri India , kawei ka dei na Bhairabi (Mizoram)-Silchar (Assam) na Jiribam (Manipur)-Silchar (Assam) bad kawei na Kamakhya-Katra Express kane kan long shisien shitaiew.
Ha kane ka sngi la plie ruh ia ka DOPPLER Weather Radar kaba don ha Sohra, ka jaka ba jur slap eh haka pyrthei, ula ong ba ka jingdon jong kane ka Radar kan iarap ha kaba ai jingtip hakaba iadei bad ka jingkhie ka eriong erngit bad ka jingtwa ki lum ki wah, hakane ka sngi la sam ruh ia ki khusam sha ki nongjop jong ka jingiamareh bad ia ki dong bad ki shong ba khuid tam.
