Shillong, Jymmang 10: Ka ophis ba dei peit ia ka Meghalaya Health Insurance Scheme (MHIS) kala shim ia ka rai ban buh noh ia ka jaka shondur na ka bynta ki paidbah ka thaiñ Mawsynram hapoh jong ka Mawsynram PHC namar ban leit sha ki shnong ki thaw ka long ba kam biang ia Internet.
Haba kren ha u SP News Agency ka ophis ba dei peit ia ka MHIS kala kyntu ia ki paidbah ka thaiñ Mawsynram bad ki shnong kiba don sawdong jong ka ba kito kiba kwah ban ioh ia ka MHIS ki dei ban leit sha Mawsynram PHC ban leit shondur.
Ka daw jong ka jingbym lah ban leit sha man ki shnong ka long ba kam don ia ka Internet, la ong ba dei tang hapoh shnong Mawsynram ba lah ban ioh ia ka Internet, kumta ka ophis jong ka MHIS kala pynbeit ban buh ia ka jaka shon dur hapoh Mawsynram PHC.
La batai ruh ba ha kane ka jingshondur ia ka MHIS ha kane ka khep kaba mynta kam dei shuh kum ha ka por ba mynshuwa ba lah ban leh bun ngut ha kawei ka smart kard, hynrei mynta kawei ka smart kard ka long na ka bynta u wei u briew kiba don kam ia kane ka Smart Kard kin hap ban leit shon ha ki jaka ba la buh.
Kane ka jingleh kam dei tang hapoh jong ka Mawsynram Block hynrei kan long ha baroh kito ki jaka ba lah ban ioh ia ka Internet, ha kito ki jaka bym don internet kin nym lah ban leit, hynrei kin buh ia ki jaka shondur ha ki jaka ba lah ban ioh internet na ka bynta ka jingsuk jong ki paidbah.
