Shillong, Kyllalyngkot 03: Na ka 444 Km ka khappud hapdeng ka jylla Meghalaya bad ka Ri Bangladesh, ki jaka kiba dang sah ba pat sdang ka jingker ksainar shiah ka long 72.8 km bad kata ka dei ha West Jiantia Hills bad East Khasi Hills District.
U Inspector General jong ki BSF Shillong Frontier u Kuldip Saini, u la ong ba ka jingbym pat lah ban sdang ia ka jingker ksainar shiah ka long ba kim pat ioh ia ka jaka bad 47 km ka jingtrei kala sdang bad kane kala iaid sha khmat.
La iathuh ruh ba ki don khathynniew tylli ki bynta kiba hap ban ker ksainar shiah na rud jong ki shnong ha kaba ki hap ban ioh ia ka jingmynjur jong ki BGB namar kane kala long jan palat sha khappud bad ka Bangladesh. Ia kane ka bynta la ia kren ruh ha ka jingialang jong ki Director Genenral jong ki BGB bad ki BSF ha nongbah Delhi ha kine ki sngi.
Ka jingeh kaba ki BSF ki ia kynduh ka long ha ka jingbym don ki surok, kane ka dei ka jingeh kaba ha khmat na ka bynta ki shipai BSF. Haba jubab ia ki jingkylli u la ong ba ki don ki surok kiba iaid na sharuh jong ka jingker ksainar shiah bad kiba don kiba jngai na ki jingker ksainar shiah.
Haba batai ia kaei kaba la jia ha u snem 2019, ki BSF kila ioh ban kurup ia ki haduh T.36 klur tyngka ki mar khaii tuh, kane ka kyntup ia ki Masi, Ki shna ban wan na Bangladesh, ka pisa India bad kumjuh ka pisa thok.
Na ka liang jong u tei u heh shipai BSF u la ong ba wat hapdeng kane ka jingeh kiba bun hynrei ki BSF kila trei bor bah ban pahara ia u pud u sam bad ka Bangladesh, ym tang ba ki pahara hynrei kila leh ruh shibun ki kam na ka bynta ka jingmyntoi jong ki paidbah kiba don ha khappud.
