Shillong, Lber 28: U Myntri Rangbah ka jylla u Conrad K Sangma haba jubab ia ka jingkylli jong u bah Mayralborn Syiem la iathuh ba ha Nongpoh Legislative Assembly Constituency la ong ba ki don 40 tylli ki shnong bym don ia ki Aganwadi bad na ka liang ka sorkar kala dep ban pan na ka sorkar pdeng ban buh 25 tylli.
Haba ia dei bad kane ka sorkar jylla kala phah biang ia ka jingpynkynmaw sha ka sorkar pdeng namar haduh mynta yn pat ioh ia ka jubab na ka sorkar pdeng, la ong ba ha ka jylla baroh kawei ki don 5630 tylli ki Aganwadi bad kiba la pyntrei kam ia ka EDC ki don 3461 tylli.
Ban pynbha ia ki Aganwadi ka ADB kan bei pisa 40 million dollar bad ka jingpynbha kan long na ka bynta ki 2000 tylli bad kan kot sha ka T.60 klur tam ne duna, na kane ki jaka ban shna thymmai kin long 266 tylli ki Aganwadi bad 547 tylli ki jaka sam shna bdoh kin long 813 tylli.
Katkum ki kyndon kiba la buh da ka sorkar pdeng ban don ia ka Aganwadi dei ban don ki nongshong shnong 300 haduh 800, ban don ia ki jaka sam shna dei ban don ki nongshong shnong 150 haduh 300 ngut, ki shnong ki bym lah ban kot ia kitei ki kyndon ki don 1500 tylli.
U Myntri Rangbah u la ong ba ha kine ki snem kiba la dep ka jylla Meghalaya ka dei ka jylla ba bun palat kiba duna ka jingkhia bad kane kala kot sha ka 46.5% hynrei ha kine ki khyndiat snem la lah ban pynduna sha ka 29.6%, katba ha Ri India ka jingdon kiba dun ka jingkhia ka long 7.9%.
Haba ia dei bad ka jingsiew ia ki ba trei haki Aganwadi bad ia ki nongiarap ka sorkar pdeng bad ka sorkar jylla kila pynkiew haba khien lang ki ba trei ha Aganwadi kila ioh T.7500 shibnai bad kiba iarap kila ioh T.5000 tyngka shibnia.
