Shillong, Jymmang 02: U myntri rangbah ka jylla Meghalaya u Conrad K Sangma mynta ka sngi u la ia kynduh ia u myntri jong ka sorkar pdeng ba dei peit ia ka tnad Social Justice bad Empowerment u Dr.Thawarchand Gehlot ha nongbah Delhi ban ia kren bad u ha kaba ia dei bad ki jingeh jong ki briew kiba don ka jingduna ha ki dkhot met ha kane ka jylla Meghalaya.
Ha kane jingiakren u myntri ka sorkar pdeng u la ai ka jingkular ba ia ka Composite Regional Centre (CRC) na ka bynta kiba don jingduna ha ki dkht met un tei ha Shillong na ka bynta ka jylla Meghalaya.
Ka jingthmu ban buh ia kane ka CRC ha kane ka nongbah Shillong ka long ba kane ka jaka kan trei kam bad kan hap hapoh ka jingpeit jong ka “National Institute for Empowerment of Persons with Multiple Disabilities” (NIEPMD). Ka jingiakren ka long kaba sei soh ha kaba u myntri ka sorkar pdeng ula kular ban kyrshan ban pynlong ia ka jingialang kaba heh ban ai jingiarap ia kiba don ka jingduna ha ki dkhot met ha Shillong bad ha Tura.
Nalor ki skhim jong ka sorkar pdeng ka sorkar jylla ruh kala bun kiwei kiwei ki lat jingiarap ia ki briw kiba don ka jingduna ha ki dkhot met da ki jingai jingsumar na ka por sha ka por da ka jingiarap na ka sorkar pdeng. U myntri rangbah ka jylla u la pynsngew ha khmat jong u myntri ka sorkar pdeng ba ka sorkar kan trei na ka bynta ka bha ka miat jong ki briew kiba don ki jingduna ha ki dkhot met.
Ha kane ka jingiakynduh ba du myntri ka sorkar pdeng u myntri rangbah u la iathuh ha u myntri ka sorkar pdeng ba la shim jingkhein antad ba ha kane ka jylla Meghalaya kiba don ia ka jingduna ha ki dkhot met ki don kumba 44,730 ngut baroh kine ki long kiba la ioh jingkhein da ka sorkar jylla.
