Shillong, Nailur 05: Ban kyntiew ia ki kam shangkai sha ki nongkyndong mynta ka sngi la pynlong ia ka jingialang ha Raj Bhavan Shillong, ia kane ka jingialang la khot da ka “Meghalaya Village Development and Promotion Tourism Cooperative Society Ltd” ryngkat ka jingiatreilang bad ka ophis jong ka Registrar of Cooperative Societies, Meghalaya, Shillong.
Ka jingkhot ia kane ka jingialang ka long da ka jingthmu ban kyntiew ia ki kam shangkai sha ki nongkyndong bad ha ka juh ka pot ban pynkiew ia ka rukom pyniaid iew ia ki mar ki mata kiba la pynmih na ki briew jong kato ka thain bad ka dong.
Haba kren ha kane ka jingialang kum u kongsan u myntri ba dei peit ia ki kam shangkai pyrthei, u Bah Metbah Lyngdoh, u la ong ba kane ka jingiakynduh lang kan nym long tang ka jaka ba ia kren kumno ban kyntiew ia ki kam shangkai sha ki nongkyndong hynrei ka dei ka kabu ban pynkiew ia ki kam shangkai ha ka jylla baroh kawei ba kan long kum ka karkhana.
Na ka liang jong u myntri u la ban jur ia ka phang ba dei ban don ka jingsaindur ba kumno ban pynlong ia kane ka kam, ha kaba ki trai shnong ki lah ban ia kynduh bad ia kren bad ki nongwan jngohkai pyrthei. U la kyntu ia baroh kiba wan ia shim bynta ba kin ia shim ia kane ka kabu ba pynlong ia kane ka jingialang kaba jop.
Kiwei kiba la kren ha kane ka jingialang ki long u Additional Chief Secretary u ba bat ia kum u Agricultural Production Commissioner, u K. N. Kumar, Registrar of Cooperative Societies, Meghalaya, Shillong, u Arunkumar Kembhavi ka Managing Director, Meghalaya Village Development and Promotion Tourism Cooperative Society Ltd., Shillong, ka kong R. Kharmujai.
Ha kane ka sngi la pyniruh ia ki phlim kiba dei bad ki jaka jngohkai pyrthei ha kane ka jylla, kiba la wan ban kren ki long na ka skul bah Martin Luther Christian University, Shillong, Lady Keane College, Shillong, ka Institute jong ka Hotel Management, Shillong, Meghalaya Rural Tourism Forum (MRTF), Meghalaya Institute of Entrepreneurship bad Tourism Department.
