Shillong, Lber 03: U Lat jong ka jylla u Banwarilal Purohit haba kren hapoh ka iing dorbar thawain ka jylla mynta ka sngi ha ka sngi sdang jong ka Dorbar mang tyngka jongu snem 2017-2018, u la ong ba ka jylla Meghalaya mynta kala don ha ka map jong ka lynti rel ha dien ba la pyniaid ia ka lynti rel na Duhnoi-Mendipathar sha Gauhati ha North Garo Hills District. Katba ia ka jingtrei ia ka lynti rel na Tetalia sha Byrnihat yn pyndep ha u bnai Lber 2018.
Haba ia dei bad ka jingshong suk shongsain ha ka jylla na ka liang jong u Lat u la ong ba ka sorkar kala shim bun ki lat ki lynti bad kaba buh ia ki jaka trei kam jong ki pulit ha ki jaka nongkyndong bapher bapher bad kane kan wanrah ia ka jingsngewsnghian ha ki paidbah. La ong ba ha u snem 2016 ki lehnoh kiba la wan ban pyndem wait ki long 117 ngut.
Haba phai sha ka skhim shna iing ia kiba duk na ka liang jong u Lat ka jylla u la ong ba la weng noh ia ka skhim kaba rimb ad la pyntung da kaba thymmai ia kaba la jer kyrteng kum ka, “Chief Minister’s Housing Assistance Programme”. Hapoh jong kane ka skhim yn ai tin sop iing lai band sha ki long iing kiba duk ba kin shna ia ki iing jong ki.
Na ka liang jong u Lat ka jylla haba kren ha kane ka sngi sdang jong ka dorbar mang tyngka jong u snem 2017-2018 , u la kren lut ia baroh ki tnad jong ka sorkar bad ia ki kam kiba ka sorkar ka don aiu ban leh na ka bynta ki paidbah nongshong shnong ha kane ka shnong mang tyngka kaba mynta.
Haba ia dei bad ka tnad shna surok u la ong ba na ki phra tylli ki jylla ka jylla Meghalaya kala dei kawei na kiba la shah jied ban ioh ia ka skhim na ka Wold Bank ia kaba la tip kum ka PMGSY Road Project-II. Hapoh kane ka skhim yn shna 290 tylli ki surok bad ka jingmang pisa ka long T. 810.42 klur tyngka. Katba na ka jylla pat ka jingmang pisa ka long T.22.588 klur na ka bynta 28 tylli ki surok.
Haba ia dei bad ka tnad sam bam sam dih ka sorkar kala dep ban thoh ia ka ki rule ia kaba la tip kum ka “Meghalaya State Food Commission Rules” bad ia kane mynta dang pynbha. Ban pynshuk ia ki paidbah ba kin lah ban ai kano kano ka jingujor ha kaba ia dei bad ka rukom sam ia ki marbam ka sorkar kala buh ia u number 1967 ha kaba ki briew ki lah ban phone ban pyntip lada don kano kano ka jingeh.
