Shillong, Kyllalyngkot 18: Ka kynhun jong ka sorkar MDA na ka jylla Meghalaya hapoh ka jingialam jong u mytnri rangbah ka jylla u Conrad K Sangma mynta ka sngi kila ia kynduh ia u myntri kampoh iing ka sorkar pdeng u Rajnath Singh ban pynpaw ia ka jingpyrshah ia ka Citizenship (Amendment) Bill, 2016.
Ha kane ka jingiakynduh na ka liang jong u myntri rangbah ka jylla Meghalaya uba la ialam ia ka kynhun MDA kaba kyntup ia ka, UDP, BJP. HSPDP, PDF, NCP bad ia ki MLA shimet, u myntri rangbah u la ong ba kane ka Bill kan sa wanrah ia ka jingeh ia ki paidbah ka jylla Meghalaya bad kum juh ia ka dang shatei lam mih ngi jong ka ri India baroh kawei bad kane kan wan ia ka jingeh ha ka shongsuk shongsain ha kane ka thain.
U myntri rangbah u la ong ba kane ka “The Citizenship Amendment Bill, 2016, kan ktah bha ia ka dong shatei lam mih ngi jong ka Ri India baroh kawei bad kane kan wanrah ia ka jinghuri hura ha kane ka thain barohkawei, laong u myntri rangbah ka jylla u Conrad K Sangma.
U Bah Metbah Lyngdoh myntri ba dei peit ia ki kam jngohkai pyrthei na ka UDP u la ong ba ki riewlum na kane ka jylla Meghalaya kan ktah bha bad u la ong ba ka sorkar pdeng ka dei ban da bishar bniah ia kane ka bill jong ka sorkar pdeng.
U Bah Hamlet Dohling jong ka PDF u ba dei ruh u myntri ba dei peit ia ki kam pynroi sor u la ong ba kala don ka jingpyrshah kaba jur haba la wanrah ia kane ka Bill hapoh Lok Sabha, u la kyntu ia ka sorkar pdeng ba ka dei ban weng noh ia kane ka bill ban iada ia ki jaidbynriew rit paid.
U Bah AL Hek na ka seng BJP u ba dei ruh u myntri ka koit ka khiah, u la ong ba ki paidbah jong ka jylla Meghalaya ki pyrshah jur ia kane ka Bill bad kum juh ki paidbah ka dong shatei lam mih ngi jong ka Ri India, U Saleng A Sangma jong ka NCP u la ba kane ka Bill kan sa pynduh jait ia ki rit paid jong ka jylla Meghalaya bad kan pynmih ia shibun ki jingeh.
Kiwei ki dkhot jong ka sorkar MDA kiba la ia don lang ha kane ka jingiakynduh ia u Rajnath Singh myntri kam poh iing ka sorkar pdeng ki long u Bah Commingone Ymbon, Bah Samlin Malgniang, Chairman State Planning Board Bah Lambor Malgniang, Bah Renikton Lyngdoh,u S.G. Mominin bad u Chief Whip jong ka sorkar u Marcuise Marak.
Ha dien jong kane u Myntri rangbah ka jylla Meghalaya u Cornad K Sangma bad u Myntri rangbah ka jylla Mizoram u Zoramthanga, kila ia kren bniah bha bad u myntri kam poh iing ka sorkar pdeng ha kaba ia dei bad ka CAB bad ki la ong ba kane ka Bill kan wanrah ia ka jingbym hun ha ki paidbah jong ka dong shatei lam mih ngi jong ka Ri India.
U myntri rangrang ka jylla Meghalaya u Conard K Sangma u la ong ha ki ladpathai khubor bad baroh ki myntri rangbah jong ka don shatei lam mih ngi jong ka Ri India kila pynpaw ia ka jingsngewkhia ka jong ki bad ki long kawei halor kane ka bynta ban pynsngew sha ki nongialam jong ka sorkar na ka bynta ka jingbha jong ki paidbah kane ka thain shatei lam mih ngi jong ka Ri India, la ong u Cornad.
