Shillong, Naiwieng 05: U bah Disparsing Rani, u wei na ki riew trei mon sngewbha mynta ka sngi u la iathuh ba lyngba ka RTI kaba u la ioh ia ka MeECL, kala paw shai kdarba wat la ki trai jaka kiba la ai jaka ban shna ia ka Umtru Hydel Power Project kila pan T.250/- tyngka shi skwer metter hynrei ka ophis Deputy Commissioner Ri Bhoi kala siew tang T.30/- tyngka.
Haba kren ha ki nongthoh khubor mynta ka sngi ha Shillong Press Club, u bah Rani, u la ong ba kane ka jingjia hapoh Ri Bhoi District, u kyntu ia ki paidbah haba ki ai jaka sha ka sorkar ki da dei ban don ia ka jingiateh kular khnang ban nym shah shet kumba la jia ia ki trai jaka kiba la ai ban shna ia ka jaka pynmih bor ding ha Umtrew.
Ki jaka kiba ka MeECL kala shim ka long haduh 1,56,367 skwer metter na ki 53 ngut ki trai jaka. Kane ka jingsiew kaba tang T.30 tyngka ka dei ka jingiihroit jong ka ophis u DC Ri Bhoi ia ki paidbah tang namar ba kam don ka jingiatehkular.
Ki trai jaka kila leit ban ia kynduh ia u myntri rangbah ka jylla u Dr Mukul Sangma ha ka 4/01.2018, ha katoka por bad ha kane ka jingiakren u myntri rangbah u la ong ba ym lah ban leh ei ei namar la aiti sha u DC bad u la ai jingmut ba kin thoh sha ka MeECL.
Bah Rani u la ong ba ki trai jaka mynta kila hap ban phet noh na katei ka jaka, la ong ba na ki 53 ngut ki trai jaka kiba la shim ia ka bai khyndew ki long tang 22 ngut. U bah Rani u la ong ba dei ha dien katei ka jingiakren bad u myntri rangbah ba rim ka jylla ha ka 05/01/2018 u la leit ban plie ia kane ka jaka pynmih bor ding iletrik.
