Shillong, Naiwieng 23: Mynta ka sngi ka Seng Kut Snem kala rakhe ia ka jingap 123 snem, ha kaba da ki lak ngut ki paidbah kiba dang bat ia ka niam tynrai kila wan ban ia shim bynta ha kane ka sngi leh burom da kaba sdang ia ka jingiaid paidbah na Madan Iewrunhep sha Madan Weking.
Ha kane ka jignrakhe ia ka jingdap 123 snem mynta ka sngi la wan ban long kongsan da u myntri pynneh pynsah riti dustur ka sorkar Arunachal Pradesh, ha ka jingkren jong u kum u kongsan ha kane ka sngi la ong haba im ka riti dustur im ka jaidbynriew.
U la ong ba u sngew sarong ban ioh ba ka Seng Kut Snem kala dap mynta 123 snem ban pynneh pynsah ia ka riti dustur kum ka jaidbynriew Khasi, Pnar bad la ioh ba ki don la ka jong ka riam ka beit kiba dang bat ban pynneh pynsah haduh mynta wat ha pdeng ka jingkylla jong ka por.
Ha kane ka jingialang paidbah la ong ba ha Arunachal Pradesh ki don 26 tylli ki jaidbynriew bad ka sorkar ka iarap ban pynneh pynsah ia la ki jong ki jong ki riti dustur bad na kitei ki don san tylli ki kynhun jaidbynriew kiba kham paw, da ka jingkylla ka por ka sorkar kala thaw kyrpang ia ka tnad Indigenous Affair Art and Culture ban iada kyrpang ia ki reiwlum.
Ha kane ka sngi ka kynhun jaidbynriew Nichi kala wan lang bad u myntri ban pyniia ka shad lehniam haba la dep ban ot kba ha kaba ki paidbah kiba la wan ban ia shim bynta ha kane ka jingrakhe ia kane ka jingdap 123 snem ka Seng kut Snem kila ia sakhi lang ia kane ka jingshad.
Ha kane ka sngi ka Seng Kut Snem kala pynkup burom ruh ia ar ngut ki riew rangbah ka seng kiba la noh syniang sha ka jaidbynriew u bah Sumar Sing Sawain bad sha u bah Sanbor Shullai Myntri ka sorkar jylla.
Ha kane ka sngi kila don ka jingkren ban pynkynmaw ia ka nongrim kaba ki 16 ngut ki riew rangbah kila seng ia ka Seng Kut Snem ban iada ia ka Riti Dustur na ka jingshah lynshop ha ki bor kiba na bar, la pynphuh pynphing ia kane ka sngi da ki jingshad tynrai na ki kynhun seng na ki shnat bapher bapher.
