Shillong, Kyllalyngkot 08: U Conrad K Samgma president jong ka National people party haba kren ha ka jingialang paidbah kaba la long ha Nartiang mynta ka sngi ban ai ka jingkyrshan ia u kyrtong ka seng u bah Sniawbhalang Dhar, ha kaba da ki hajar ngut ki briew kila ia tuid sha kane ka jingialang, u u la ong “Haba ki nongialam congress kim don shuh ka jingkyrmen shuh balei ki paidbah kin dang shaniah ia ka”.
U Conrad u la ong ba kane ka election 2018 ka long kaba don kam na ka bynta jong ki namar ki paidbah kim don shuh ka jingshaniah ha ka seng congress, la ong ba ka don ka por ba ka seng congress kala synshar haduh 18 tylli ki jylla hapoh jong ka Ri hynrei mynta kala hiar sat ang ha ki saw tylli ki jylla bad mynta u snem 2018 ruh ka congress kan nym wan shuh ha ka bor.
Ha kane ka jingialang paidbah u Conrad u la ong ba ka jingduh jingshaniah kam dei tang ki paidbah hynrei wat u Dr DD Lapang, u Deputy Chief Minister Dr RC Laloo, ka myntri ka koit ka khiah kong Roshan Warjri ruh kim treh shuh ban ia khun ia ka MLA Election kaba ban long mynta u snem. Kane ka pyni ba ki nongialam ka seng congress kim don shuh ka jingkyrmen ha ka party kaba ki don, la kynthoh u Conrad.
Ha kane ka jingialang paidbah la ong ba ha ka election MLA 2013 u myntri rangbah ka jylla u Dr Mukul Sangma u la kular ban ai T.5000 ha ki riew kynthei jong ka Selsella constituency ha kaba ia ka pisa la phah sha ka account jong ki, hynrei ha dien ka election la khate noh ka ka account jong ki namar la ai sha ki ha ka dur jong ka ram. U Conrad u la ong ia ki paidbah ba kin long kiba husiar ia ka seng congress.
Ha kane ka jingialang paidbah u Conrad u la ong ba ka Sorkar Congress kam shym la lah ban pynkiew ia ka ioh ka kot jong ki paidbah khamtam kito kiba shniah ia ka ja kpoh jong ki na ka kam tih dewiong. U la ong ba u Dr Mukul u kwah ban tih da ka MMDC, u tei u nongialam jong ka seng NPP u la ong lada ka MMDC ka lah ban tih balei ym ailad ia ki paidbah u la buh ka jingkylli.
Na ka liang jong u Conrad u la kyntu ia ki paidbah ba kin pynjop ia ki kyrtong jong ka NPP ha kane ka kynti kaba mynta ban wanrah ia ka jingkylla ha ka ioh ka kot ha kane ka jylla Meghalaya. U la ong kumba ka long mynta ka jingkwah jong ki paidbah ka long ba ka NPP ka dei ban wan sha ka bor ha kane ka kynti kaba mynta.
Ha ka jingkren jong u bah Prestone Tynsong u la kynnoh ba ka jinghiar ka ioh ka kot ha ka jylla ka dei na ka daw jong u myntri rangbah ka jylla u Dr Mukul Sangma, u la ong ba u myntri rangbah ym shym la shim khia ha kaba ia dei bad ka NGT, u la ong ba u myntri rangbah um shym la sngap ia ka jingai jingmut jong u ban thaw ia ka committee ban peit bniah ia kane ka kam khang tih dewiong da ka NGT, la ong u Bah Tynsong.
U bah Sniawbhalang kyrong ka NPP ha ka jingkren ka jong u la ong ba ka party NPP ka dei ka party jong ki paidbah kam dei ka kam poh iing, u la ong ba u da sngewsih shisha ba dei na ka jingle jong u Dr Mukul Sangma ba kala ktah lut ka ioh ka kot ha ka jylla na duh ki nong die kwai dong haduh kiba trei kam la jong kala shah ktah lut khoit.
U la ong ba dei tang u Conrad Sangma u ba la kren ia ki jingeh jong ki paidbah hapoh parliament bad ka jingshah leh bein ki Khristan. Ka jingkynnoh ba ka NPP ka don ka jingiadei bad ka BJP ka dei kaba bkla shibun. Ka jingkwah jong u Dr Mukul ban tih dewiong da ka MMDC kan ktah ia ka ioh ka kot ki paidbah ha Jaintia hills.
