Shillong, Nailur 08: Ka thanat kaba don ha Sohra ia kaba khlem pyndon kam shuh mynta ia kaba la shna ha ka por jong ki phareng ha kaba kila pynlong ia ka Sohra ka nongbah jong ka dong shatei lam mih ngi, ia kaba la tip kum ka Assam ha kato ka por ka dang ieng haduh mynta.
Na ka liang jong ka tnad pulit ka ngiet ba kane ka dei ka thanad kaba nyngkong duh kaba la shna da ki phareng ha kane ka thain bad kane ka iing ka dang sah haduh mynta kaba la kylla ka jaka set bike ha Sohra Police Station mynta. Kaba la pynsiew dur shuh shuh ia kane ka thanat ka long ba na ki arliang jong kane ka iing la shna ia ki sem set kali.
Ha ka jingialang kaba la long mynta ka sngi ha Sohra u wei na ki riew rangbah u la pynsngew ha u Shongknor jong ka iing dorbar thawain ka jylla u Dr Donkupar Roy ba dei ban ker ia kane ka thanat ba kan long kum ka jaka kyrpang namar kane ka jaka ka don la ka jong ka khana pateng.
Ha duh mynta ki paidbah ka shnong Sohra ki iathuh khana ba dei ha kane ka thanat ba la set ia u Syiem ka Hima Nongkhlaw u Pa,im Tirot Sing Syiem haba ki phareng kila kem ia u shuwa ban rah ia u sha Dhaka, ba ka malkahna ne ka kamra ba set ia u Syiem Tirot Sing ka dang don ha duh mynta.
