Shillong, Jymmang 23: Ka jingialang jong ki ar tylli ki party ka NPP bad ka BJP na ka Ranikor Konstitwensi kaba la long ha Shillong, kila poi sha ka jingiasngewthuh jingmut ba kine ki ar tylli ki party kin ia treilang ban pynieng tang u wei u kyrtong ha ka MDC Election 2019 na katei ka Konstitwensi.
Ia kane ka jingialang la pyniaid da u Bah C Shangdiar president jong ka NPP Ranikor Block Constituency. Kine ki ar tylli ki party kila rai ban pynieng tang u wei na kawei ka kyrtong MDC. Ha kane ka jingialang kila ia kren ba kumno ban ia trei shitom ban poi sha ka jingjop ha kane ka MDC ka ban wan.
Ha kane ka jingialang u Bah Dliwell Marwei Vice president jong ka BJP jong ka South West Khasi Hills District, u la kren shai ba lada kam don ka jingiatreilang kan nym poi shaei shaei ruh. U ne u nongialam jong ka BJP u la ong ba mynta kine ki ar tylli ki seng ki don ha ka bor synshar ha ka jylla bad kum juh ha ka sorkar pdeng.
Ha kane ka jingialang la kyntu ia baroh ki nongtrei jong kine ki ar tylli ki party ba kin ia trei shitom na ka bynta ba kin wanrah ia ka jingjop. Na ka bynta ban pyniaid ia ka kam la ong ba kin ia ap haduh ba kan da kut ka election ha Ampati bad kin sa ia pynbeit kloi katba lah.
