Shillong, Lber 16: Ka dorbar mang tyngka jong ka iing dorbar thawain ka jylla Meghalaya na ka bynta jong u snem 2018-2019 la sdang mynta ka sngi da ka jingkren jong u Lat ka jylla u Ganga Prasad, ha kaba u la ai ia ka jingkren ka jong u da ka ktien Hindi.
Ia kane ka jingkren jong u Lat ka jylla la pynkylla pat sha ka ktien phareng ha kaba la sam sha baroh ki dkhot jong ka iing dorbar thawain ka jylla shuwa ba u Lat un ai ia ka jingkren hapoh ka iing dorbar thawain ka jylla.
Ha ka jingkren jong u Lat, u la ai khublei ia baroh ki dkhot jong ka iing dorbar kiba dang shu jop shen ia ka election sha ka iing dorbar thawain ka jylla. Naka liang jong u Lat u la ong ba katba kane ka iing dorbar kaba dang sdang mynta ha kine ki khyndiat por kan sa iohi ia kiba bun ki polisi thymmai na ka bynta ban wanrah ia ka roi ka par ha ka jylla ha baroh ki liang.
Ha kane ka jingkren jong u Lat kaba la pynkylla sha ka ktien phareng kaba la don haduh 46 sla, na ka na ka liang jong u lat ka jylla u la kdew ia baroh kit and sorkar ia kawei kaba ka sorkar kan leh na ka bynta jong ki paidbah, ha ka liang ka koit ka khiah, ki lynti syngkieng, ki surok, na ka bynta ka rep ka riang bad kum juh ia ka shong suk shongsian.
Ha kane ka jngkren ka jong u Lat ka jylla u la kdew ia kiei kiba ka sorkar kan leh ha kine ka snem mang tyngka na ka bynta ka roi ka par jong ka jylla ha kiba bun ki liang la ka long ia ki jaka sor badkum juh ia ki nongkyndong.
Ia u Lat jong ka jylla la leit ban shaw da u Shongkor jong ka iing dorbar u Dr Donkupar Roy, U Myntri rangbah ka jylla u Conrad K Sangma bad u nongialam ka liang pyrshah u Dr Mukul Sangma na phyllaw jong ka iing dorbar sha iing dorbar ban ai ia ka jingkren ka jong u.
