Shillong, jymmang 10: Ka Joint Parliamentary Committee (JPC) kaba la thung kyrpang da ka iing dorbar bah jong ka Ri India kala wan mynta ka sngi sha kane ka nongbah Shillong ban ia kynduh ia ki paidbah kane ka jylla ban pan ia ka jingsngew jong ki halor ka jingthmu jong ka sorkar pdeng ban wan rah ia ka jingkylla ha ka ain ki nongshong shnong jong ka Ri India ia kaba la tip kum ka Citizenship (Amendment) Bills, 2016.
Kane ka JPC kan don ha kane ka nongbah Shillong ar sngi lynter, ia kaba la sdang ia kane ka jingiakynduh paidbah mynta ka sngi ha State Convention Centre Shillong bad ia kane ka jingiakynduh kin beteng biang la shai ka sngi ha ka juh ka jaka ban sngew ia ka jingpynsngew na ki paidbah kane ka jylla Meghalaya halor katei ka jingthmu jong ka sorkar pdeng.
Ha kane ka sngi sdang jong kane ka jingiakynduh paidbah kaba ar sngi jong ka JPC ha kane ka nongbah Shillong, ki seng bhalang kiba la leit ban ai da ka jingthoh sha ka JPC ban pynsngew iau ki donb an kren halor katei ka Citizenship (Amendment) Bills, 2016, ki long ka seng Hynniewtrep Youth Council (HYC) ka FKJGP, ka SRS, ka HNYF bad ki riew rangbah kiba la poi ki long u Bah John F Kharshiing, Bah Donkupar Warbah RL Blah.
Na ka liang jong ka FKJGP, nalor ba kala leit ban ai ia ka jingthoh ha kaba ia dei bad ka Citizenship (Amendment) Bills, 2016, kala pynlong ruh ia ka jingiakhih shong kyllain mungor ban pynpaw ha khmat ki dkhot jong ka JPC ba ka seng ka pyrshah ia katei ka ain ba la thmu ban wanrah ia ka jingkylla da ka sorkar pdeng.
