Halor ka District Task Force ia kynduh ka KSU ia ka Kong Laloo DC ka SWKH District

Mawkyrwat, Nailur 6: Ka KSU South West Khasi Hills District hapoh ka jingialam jong u samla Jiedskhem Nongsiej General Secretary ka la leit ban iakynduh iaka Kong I. Laloo, Deputy Commissioner ka South West Khasi Hills District  ban pynkynmaw halor ki mat kiba ka seng ka la ju kren bunsien iaki bor district bad kita ki long halor ka District Task Force ban tehlakam iaki nong shongwai bar jylla  khamtam hapoh ka thain khappud jong ka District bad ruh halor ka Work Permit na bynta ki nongtrei bar jylla hapoh ka District.

Ha kane ka jingiakynduh jongka seng la iadon ryngkat Lang ruh da ki Labour Inspectors jongka District. Halor ka mat jong ka District Task Force ka seng ka la pynkynmaw bad kyntu iaki bor district ba namar ia kane ka committee Lah thaw naduh u snem 2018 bad kila pynpaw ruh iaka jingsngewdiaw halor ka jingsuki pat ban pyntreikam pura.

Ka seng ka sngew ba ka long kaba donkam kyrkieh shikatdei eh khamtam ban kham tah tehlakam iaka jingwan rung ki bar jylla naka daw ka NRC ha Assam.  Naka liang ka DC ka la iathuh ba ka la phah ia kine ki ain kum ka jingpyntip sha ki shnong bapher bapher khamtam haka thain border hynrei ka jingsuki ka long namar kham hadien la hap ban pynkylla Khasi shwa ia kane ka ain naka jingkyrpad jongki bor shnong.

Haba iadei bad ka Work Permit pat ka seng ka la pynpaw iaka jingsngewkhia halor ka jingsuki ban phah register iaki nongtrei bar jylla daki kontractors bad ki nongkhaii mawshun ne dewiong watla ia ka District Level Team la dep thaw hapoh ka District naduh u snem 2016 bad wat haba ka District ka la don la ki jong ki Labour Inspectors ban peit iaka Ranikor Block bad Mawkyrwat Block.

Ka seng ka la pynsngew ruh namar katba kum ka jubab RTI ba ngi la ioh ha baroh kawei ka District South West Khasi Hills District dang don tang uwei u kontractors ba register iaki nongtrei bar jylla katba kum ka Work Permit.  Ka seng ka la pynsngew iaki bor District bad iaki Labour Inspector ba ki dei ban shimkhia iaka kam ha kaba ki la kular ban hiar shaki thain khappud bad ha kiwei kiwei ki jaka ban Lap halor kane.

Ka seng hadien  ba kila pynsngew ia kine ki juh ki mat la bunsien bun wat ngi banjur ba dei ban pynsted ban pyntreikam bad ngi dawa ruh iaki Labour Inspector ba la thung khnang halor kane ka bynta ba kidei ban pyndep hok iala ka kamram.  Ka seng ka maham ruh ba lada dang nang pynsuki halor kine ki mat,

Ka por kam shah shuh iangi ba ngin iaishah hynrei sa tang ban leh hi noh iala ka bynta lada kam Don ka jingkitkhlieh naki bor ba dei peit.  Kum ka seng ka iaishah namar ki sngewthuh iaki jingeh jong ki Labour Inspectors bad ki bor district hynrei ki kren shai ba ka jingiaishah ka don la u pud ba lada kan iai long shi iai long kumne ngin hap shim iaka rai ban leh hi noh bad pynpaw iaka bor lada kan long ha kano Kano ka por.  La ong u samla Forwardman Nongrem, President KSU South West Khasi Hills District

What Next?

Recent Articles

Leave a Reply

Submit Comment

*