Shillong, Lber 10: Ki pulit jong ka jylla Meghalaya ha ka miet 9/03/2020 kila phah ia ka kynhun pulit sha ka thain Syntung, Jatah bad Mawsna bad ha kane ka jingleit la kem i
a ki 27 ngut ki briew kiba la suba ba ki don kti ha kaba bom ia ki briew kiba leit bam khana sha Syntung.
Ha kane ka jingiabom paidbah la wanrah ia ka jingkhlad noh jong u Bah Macmilan Kharshandy, pynmynsaw ia ar ngut kiba dang don mynta ha Civil Hospital Shillong ban shah sumar, ia kaba la jia ha Lad Mawlong.
Na ka liang jong ki pulit la ong ba na kine ki 27 ngut, ha dien ba la bishar bniah la pynlait noh ar ngut, u wei u dei u ba la tynmen bad u wei pat u ba dang khynnah rit palat, ia kine ki ar ngut la pynlait noh ha katei ka miet bad ia ki 25 ngut la wan rah sha Shillong bad mynta ka sngi la rah ia ki sha iing bishar.
Na ka liang jong ki pulit kila register ejahar pyrshah ia kitei ki briew ha ki kyndon ain bapher bapher bad na ka liang jong ki pulit ki dang thwet haduh mynta ia kiwei pat kiba la suba ba don kti ha kane kam shoh briew kaba la wan rah ia ka jingiap briew.
Na ka liang jong ki pulit kila ong ba ki briew kiba la ap lynti ha ka shnong Passang ha kaba kila bom ia kine ki khyndai ngut ki briew, ha kane ka jingiabom da ki paidbah lai ngut kila mynsaw jur bad hynreiw ngut kiwei pat kila ioh phet.
Na pdeng kine ki lai ngut kiba la shah bom u wei u khlad noh ynda ka poi hapoh Civil Hospital Shillong. Kane ka jingjia kala jia ha ka jam miet jong ka phra tarik bad la ioh ban pynlait ia ki ha ka 9 tarik mynstep.
