Shillong, Naitung 22: Ka seng ki nongtrei hapoh jong ka EMRI hapoh ka jylla Meghalaya ha ka lama Meghalaya EMRI Workers Union (MEWU) mynta ka sngi kila shim ia ka rai ban weng noh ia ka jingiakhih ka jong ki ha dien ka jingiakren bad u myntri ka koit ka khiah jong ka sorkar jylla u Bah AL Hek, ha ka jingiadon lang ki bor pyniaid jong ka GVK kiba peit ia ka EMRI 108 Ambulance ha Meghalaya.
Haba kren ha ki nongthoh khubor ha dien ka jingialang bad u myntri ka koit ka khiah jong ka sorkar jylla u Bah Rishot Kharraswai u la iathuh ba ha kane ka jingiakren na ka liang jong u myntri u la bethah ia ka GVK ba kan weng noh ia ka jingpynkynriah kam ia ki 12 ngut ki nongtrei bad ban weng noh ia ka jingpynsangeh kam ia ki nongtrei.
Ban pynpeit ia ki jingeh kiba don hapoh jong ka EMRI, la thaw ia ka Kommittee kaba kyrpang ia kaba la tip kum ka “Speical Committee” ka ban khlieh da u Secretary ka tnad ka koit ka khiah, ki ban ia don lang ki long na ka ki bor pyniaid ka GVK bad kum juh na ka Union kin don lang saw ngut.
Dei halor kine ki jingiakular jong u myntri ka koit ka khiah na ka liang jong ka seng kan weng noh ia kane ka jingiakhih jong ki naduh la shai ka sngi. Ha kane ka committee kaba kyrpang kin ia kren bniah ia ki jingeh jong ki nongtrei kaba kila dep ban buh ha khmat ka sorkar mynta la bun bun bnai. Kane ka Committee kan pyndep ia kane ka kam hapoh ar bnai.
