Shillong, Naitung 15: Katba nangmih ki sngi; ki kynthei bad ki samla kynthei kila nangduh nangduh kata ka jingshngaiñ haka ïaid ka ïeng na ka daw ba ki kam khyllah pyrshah ïa ki kynthei kila nangkiew. Haka jingwad jingtip kaba dang pyrthei dang shen ruh la lap ba ka ri India ka dei kawei na ki ri kaba ha trai eh ha kaba ïa dei bad ka jingshngaiñ jong ki longkmie bad ki samla kynthei ruh kumjuh.
Ka Seng Kynthei ka Balang Unitarian kala ju pynlong ïa kiba kum kine ki prokram ymtang hapoh ki balang; hynrei wat ha ki ïew ki hat ruh kumjuh. Kawei na kiba kum kine ki prokram ka dei ha ka nongbah jong ka West Khasi hills ha Nongstoi ha kaban hikai ïa ki longkmie bad ki samla kynthei bad khamtam ki shynrang ha kaba ïa dei bad ka jingkiew sted ki kam sniew pyrshah ïa ki kynthei.
Ka Seng Kynthei jong ka Balang Unitarian ha ri Khasi Jaiñtia bad Karbi Anlong kala ju pynlong ruh ïa white ribbon campaign ha kaba ai jingtip shaphang ka jingsniew bad ka jingjyllei ki kam sniew pyrshah ïa ki kynthei.
Haka 14 tarik jong une u bnai kane kajuh ka seng haka jingïatreilang bad ka North East Network, Shilong kala pynlong ïa ka prokram haka skul H.K. Singh haka jingïadonlang ki dkhot jong ka Seng Kynthei ka balang, Jowai bad kumjuh ruh ki khynnah skul.
Haka jingïalang kaba la pynïaid da ka (Retd) Major Elgiva Shullai kaba long ka coordinator jong kane ka prokram naka linga ka Seng Kynthei; la ïoh ïa ka jingkren na ka Kong Gina Phanbuh bad kong Susana Synrem naka North East Network kiba la pynshai halor kane ka phang.
Kine ki arngut ki dei kiba mihkhmat jong ka NEN kaba long kawei na ki Seng Kynthei kaba trei borbar ha kaba ïadei bad ki kam pyrshah ïa ka jingshah ban beiñ jong ki kynthei. Ïa ki kyntien ai khublei la tyrwa daka kong Daiamonlang Lyngdoh Secretary ka Balang Unitarian, Jowai.
