Shillong, Jymmang 12: U Myntri rangbah ka jylla u 
Conrad K Sangma ryngkat bad Amit Kumar Advocate Genenral jong ka sorkar jylla mynta ka sngi u la ia kynduh ia u myntri ka sorkar pdeng ba dei peit ia ka tnad tih dewiong ha ka Ri u Piyush Goyal ban ia kren kumno ban pynlait noh ia ka jingkhang tih dewiong ha kane ka jylla Meghalaya.
Na ka liang jong u myntri rangbah ka jylla bad u Advocate General kila ia kren kyrpang ruh bad ki heh jong ka tnad “Ministry of Coal” ha kaba la don Additional Secretary bad u Joint Secretary jong kan, “Ministry of Coal” ha kane ka jingiakren.
U myntri rangbah u la ong ba ka jingiakren kumno ban ioh sdang biang ban ioh tih dewiong ha kane ka jylla ka long jam sha khmat, na ka liang jong ka tnad tih dewiong jong ka sorkar pdeng kala bethah ia ka sorkar jylla ba kan pynkhreh ia ki lad ki lynti kumno ban iaid sha khmat bad ka jingtih dewiong. Ka kynhun na ka sorkar pdeng ba dei na ka “Ministry of Coal” shen kan wan sha kane ka jylla.
Ha kane ka jingiakynduh na ka liang jong u myntri rangbah ka jylla u Conrad K Sangma u la ong ba ka jingiakren ka long kaba seisoh namar na ka liang jong ka sorkar pdeng kala ai ka jingkular ba kin iarap ia ka jylla ban weng ia kane ka jingeh ha kaba ia dei bad ka jingkhang tih dewiong ha kane ka jylla Meghalaya. Ha kine ki ar bnai u myntri rangbah ka jylla u la leit ban ia kynduh ia u myntri ka sorkar pdeng ba dei peit ia ka kam tih dewiong la ar sien lynter.
