Shillong, Naiwieng 23: Mynta ka sngi kala saphriang ka khubor ba u Lat jong ka jylla u Tathagata Roy u la kyntait ia ka jingpang jong ka sorkar ban pynjari ia ka jingsynshar Administrator hapoh jong ka KHADC.
Ka sorkar jylla ha ka 21 tarik mynta u bnai kala phah ia ka jingthoh sha u Lat jong ka jylla ha kaba ia dei bad ka jinglong jingman ka sian pyrthei hapoh ka KHADC ha dien ba kala ioh ia ka jingujor na ki 14 ngut ki MDC ha kaba ia dei bad ka jingiatynjuh bor kaba la long ha ka 20 tarik ha kaba ka EC jong u bah Teinwell Dkhar kala khyllem da ka vote jong u Lamphang ka iing dorbar.
Halor kane ka jingsphriang khubor ba la kyntait u Lat ka jylla ban pynjari ia ka jingsynshar Administrator hapoh jong ka KHADC, na ka liang jong u SP News Agency u phone ia u bah Prestone Tynsong Symbut myntri rangbah ka jylla ban kylli hato ka dei ne em ka jingshisha, na ka liang jong u myntri symbut rangbah ka jylla u la ong “Sa Phone”.
Halor kane ka juh ka khubor haba la phone ia u Lamphang jong ka iing dorbar KHADC, ym shym la kren wat la ka phone ka pah. Haba la phone ia u CEM jong ka KHADC u Bah Latiplang Kharkongor u la iathuh ba u ruh u la ioh ia kane ka jingtip hynrei ym pat lah ban ong ka dei ne em namar ym pat ioh ia ka jingthoh haduh mynta.
Haba la kylli na u bah Lamphrang Blah MDC jong ka Congress kiba ia don lang ha ka kynhun UDF, u la iathuh ba u ruh u ioh sngew ia kata ka juh ka khubor hynrei u dang pyrshang ban kylli pynthikna la ka dei ne em.
